Almatyda «Nur Otan» partııasy qalalyq fılıalynyń kezekten tys konferentsııasy ótti

ALMATY. QazAqparat - «Nur Otan» partııasy Almaty qalalyq fılıalynyń kezekten tys konferentsııasy barysynda Baýyrjan Baıbek Elbasy tapsyrmalaryn, sondaı-aq jańadan saılanǵan Prezıdenttiń saılaýaldy tuǵyrnamasyn jáne barlyq memlekettik baǵdarlamalardy iske asyrýǵa qatysty partııalyq prıntsıpti jáne qatań baqylaýdy uıymdastyrý qajettigin atap ótti, dep habarlaıdy QazAqparat tilshisi.

«Partııa tóraǵasy Nursultan Nazarbaev «Nur Otan» transformatsııasy týraly tapsyrma berdi. Partııa jumysyndaǵy kózqarastardy túbegeıli qaıta qarap, júktelgen mańyzdy sharýalardy júzege asyrý qajet. Biz tyńdap qana qoımaı, adamdardy estýimiz kerek, problemalyq máselelerdi sheshýge tıispiz. Adamǵa qamqorlyq jasaý, onyń quqyqtary men bostandyqtaryn qorǵaý, laıyqty ómir súrý deńgeıin qamtamasyz etý - biz úshin basty basymdyq», - dedi Baýyrjan Baıbek.

Onyń aıtýynsha, búgingi kúni partııa qataryndaǵylardy bir tekserip shyǵý qajet. Bul másele sanǵa emes, qaýymdastyqtyń sapaly quramyna negizdelýi tıis. Budan basqa, «Nur Otan» partııasy tóraǵasynyń birinshi orynbasary partııanyń qoǵamdyq qabyldaýlaryn reformalaýdy, máslıhat depýtattarymen jáne parlamenttik fraktsııamen ózara is-qımyldy nyǵaıtýdy tapsyrdy.

«Partııa halyqqa jaqyn bolýy kerek. Halyqpen keri baılanysty nyǵaıtýǵa, qoǵamnyń talaptaryna tez arada jaýap berýge, aǵymdaǵy úderisterge belsendi túrde áreket etýge atsalysýy kerek. Úkimettik emes uıymdarmen ózara qarym-qatynasta bolý mańyzdy. Jumystardy barlyq áleýmettik toptarmen birigip júrgizý kerek. Bul jastar, zeınetkerler, múgedekter, áleýmettik jaǵynan osal toptar, kóp balaly analar, jumyssyzdar jáne basqalar», - dedi Baýyrjan Baıbek.

Konferentsııa barysynda Almaty ákimi Baqytjan Saǵyntaev «Nur Otan» partııasynyń qalalyq fılıalynyń tóraǵasy bolyp saılandy.

Avtor: Alma Muqanova