Almatyda «Nur Otan» atynan máslıhat saılaýyna túsetin úmitkerlerdiń tizimi bekitildi

ALMATY. QazAqparat – Almatyda «Nur Otan» partııasy qalalyq fılıalynan máslıhat depýtattyǵyna úmitkerlerdiń partııalyq tizimin tirkeý aıaqtaldy, dep habarlaıdy QazAqparat tilshisi.

Búgin megapolıste Almaty qalasy aýmaqtyq saılaý komıssııasynyń otyrysy ótti. «Nur Otan» partııasynyń Almaty qalalyq fılıalynan Almaty qalasy máslıhatynyń depýtattyǵyna kandıdattardyń partııalyq tizimin tirkeý týraly másele qaraldy.

«Kandıdattardyń talaptarǵa sáıkestigi anyqtalǵannan keıin «Nur Otan» partııasy Almaty qalalyq fılıalynyń partııalyq tizimi eskertýsiz tirkeldi. Aıta keteıik, qalalyq konferentsııa barysynda máslıhat depýtattyǵyna 78 adamnan turatyn kandıdattardyń partııalyq tizimi jasaldy. Olardyń qatarynda barlyq áleýmettik jáne kásibı toptardyń ókilderi bar. Onyń ishinde 27 áıel (35%) jáne 35 jasqa deıingi 15 jas bar (20%)» dep habarlady partııanyń baspasóz qyzmetinen.

Aıta keteıik, eger saılaýdy belgileý kezinde ózgertýler engizilmese, partııalyq tizim boıynsha saılanatyn máslıhat depýtattyǵyna kandıdattardy usyný saılaý kúnine eki aı qalǵanda bastalady jáne oǵan bir aı qalǵanda jergilikti ýaqytpen saǵat on segizde aıaqtalady.

Saıası partııalar usynatyn partııalyq tizimdi tıisti aýmaqtyq saılaý komıssııalary tirkeıdi.