Almatyda nóserden kósheler men aýlalardy sý basty

ALMATY. Qazaqparat - Almatyda nóser jaýyn jaýyp, qala aýmaǵynda birqatar kóshe men turǵyn úılerdiń aýlasyn sý basyp qaldy. Jaýynnyń saldaryn joıýǵa tótenshe jaǵdaı qyzmetkerleri jumyldyryldy, dep habarlaıdy QazAqparat tilshisi.

Qalalyq Tótenshe jaǵdaılar departamentiniń málimetinshe, búgin toqtaýsyz jaýǵan jańbyrdyń saldarynan qala kósheleri men turǵyn úılerdiń aýlasyna sý toldy.

« Búgin saǵat 15:00-degi jaǵdaı boıynsha Almaty qalasy Tótenshe jaǵdaılar departamentiniń «112» jelisi men «109» qutqarý qyzmetine Almaly aýdanyndaǵy Raıymbek dańǵyly, 234, Aıtıev kóshesi, № 8 jáne № 6 úı aýlalary men jertóleleriniń sý basýy týraly habarlama kelip tústi. Atalǵan mekenjaılarǵa sý soratyn tehnıka men adamdar jiberildi»,- dep habarlady TJD baspasóz qyzmetinen.

Almatynyń barlyq segiz aýdanynda sý basýdyń aldyn alý úshin ınertti materıaldar daıyndaldy. Qazseldenqorǵaý mekemesi baqylaýdy kúsheıtti.
Sýdy kedergisiz aǵyzý jáne soryp alýdy qamtamasyz etý úshin 609 adam, 252 birlik arnaıy tehnıka jáne 24 motopompa jumyldyryldy. Qum salynǵan 2050 qap daıyndaldy.

Buǵan deıin Qazgıdromet aldaǵy kúnderi Qazaqstannyń basym bóliginde jaýyn jaýatynyn eskertken bolatyn.