Almatyda «Nıva» kóligin urlap júrgender ustaldy
ALMATY. QazAqparat - Almatyda tek «Nıva» avtokólikterin urlap kelgen qylmystyq top áshkerelendi, dep habarlaıdy QazAqparat tilshisi.
Almaty polıtseıleriniń habarlaýynsha, qylmystyq top quramynda úsh adam bolǵan. Olar Almaty jáne Almaty oblysynda kólik urlap, satýmen aınalysqan.
«35 jastaǵy er adam apatqa ushyraǵan kólikterdi satyp alyp otyrǵan. Sosyn, Ózbekstan týmasy, buǵan deıin kólik urlaǵany úshin isti bolǵan 53 jastaǵy er adam men onyń 54 jastaǵy «dosyna» apatqa ushyraǵan kóliktiń túr-formasyna uqsaıtyn kólikti alyp kelýge tapsyrys bergen. Sońǵy ekeýi apatqa ushyraǵan kólikke uqsas kólikti urlap alyp kelgen soń, garajda memlekettik nómirlerin aýystyryp satyp otyrǵan», - deıdi qalalyq ІІD KPB basshysy Janbolat Zıadın.
Qazirgi ýaqytta olardyń barlyǵy ustalyp, QR QK 188 baby boıynsha qylmystyq is qozǵaldy. Urlanǵan kólik zańdy ıelerine tabys etildi.
