Almatyda neırohırýrgter jańa ınnovatsııalardy qoldanyp jatyr
ALMATY. QazAqparat - Almatynyń №7 qalalyq aýrýhanasynda bas súıek kemistigin joıý úshin 3D ımplanttardy keńinen qoldanyp jatyr. Neırohırýrgter sanaǵa kúrdeli ota jasaý tájirıbesin qolǵa aldy, dep habarlaıdy QazAqparat tilshisi.
«Kranıoplastıka - bas súıek kemistigin joıý úshin 3D ımplanttardy qoldanatyn sony tehnologııa. Kúrdeli bas súıek-mı jaraqattaryna, qaterli isikke, súıekterge ota jasaýǵa qoldanylady. Biz osy ádistemeni engizgennen keıin 20-ǵa jýyq naýqasqa ota jasadyq. Sonyń bári de sátti ótti. Qazaqstanda bul ádisteme bıyldan bastap keńinen qoldanyla bastady», - deıdi №7 aýrýhananyń 3-neırohırýrgııa bóliminiń meńgerýshisi Valerıı Tıan.
Implant otaǵa deıin ázirlenedi. Bul otanyń ýaqytyn qysqartyp, ınfektsııa túsý qaýpiniń aldyn alady. Kranıoplastıkalyq otalar ázirge aýrýhanada jasalady.
Bıyl Qazaqstanda adam sanasyna kúrdeli neırohırýrgııalyq ota jasala bastady. Ondaı otalar isik mıdyń qyzmettik bólikterinde, ıaǵnı bizdiń sóıleýimizge, qımyldarymyzǵa jaýap beretin bólikterinde ornalasqan kezde jasalady.
«Mundaı otany birneshe maman jumyla otyryp jasaıdy. Ota kezinde anestezıologııalyq qural naýqas dárigerdiń qarapaıym suraqtaryna jaýap bere alatyndaı etip beriledi. ıAǵnı, otanyń aldynda naýqas uıqyǵa ketedi, neırohırýrgııalyq ota jasalyp jatqanda ol oıanyp, dárigerlermen sóılesedi. Sosyn jalpy anestezııa berilip, ol uıqyǵa ketken soń ota aıaqtalady. Al naýqas aýrý sezbeıdi», - deıdi neırohırýrg dáriger Juldyz Sadyqova.
Ota zamanaýı, joǵary tehnologııalyq neırooperatsııalyq qondyrǵynyń kómegimen júrgiziledi.
Gúlzat Sahova
