Almatyda nesıe alyp, qara tizimge ilikken adamdardyń máselesin «sheshetin» alaıaq ustaldy

ALMATY. QazAqparat - Almatyda 30 jastaǵy er adam nesıe tarıhy nashar azamattardy aldady, dep habarlaıdy QazAqparat tilshisi.

Almaty qalalyq polıtsııa departamentiniń málimetinshe, Qazaqstan Respýblıkasynyń búkil aýmaǵynda onnan astam jábirlenýshi alaıaqtyq týraly aryzben polıtsııaǵa júgindi.

Tártip saqshylarynyń aqparatyna sáıkes, A. esimdi jigit nesıe tarıhy nashar adamdarǵa bul máseleni «sheship berýdi» usynǵan.

Ol óziniń jumysy úshin qomaqty soma suraıdy.

Aqshany alǵannan keıin er adam belgisiz baǵytta jasyrynǵan. Qolyndaǵy qarajatty óz qajetine paıdalandy.

«Jedel izdestirý barysynda 30 jastaǵy Almaty oblysynyń týmasy ustaldy. Qazir kúdiktige qatysty 10 alaıaqtyq faktisi dáleldendi. Sonymen qatar jábirlenýshiler tek Almatydan ǵana emes, Qazaqstannyń basqa da qalalarynan júgindi. Bul fakt sotqa deıingi tergeýdiń biryńǵaı tiziliminde 190-bap boıynsha tirkeldi», – dedi Almaly aýdandyq polıtsııa basqarmasynyń bastyǵy Esen Ysqaqov.

Kúdikti qazir ýaqytsha ustaý ızolıatorynda otyr. Polıtseıler aldanǵan adamnyń kóp ekenine senimdi.

«Ustalǵan adamnyń sýretine muqııat qaraýyńyzdy suraımyz. Osy er adamnyń áreketinen zardap shekken adamdardy myna telefondarǵa habarlasýlaryn suraımyz: 8-708-707-9202; 8-705-771-1371; 8-705-555-7763, – dedi Esen Ysqaqov.