Almatyda «nesıe alýǵa kómektesetin» erli-zaıypty ustaldy

ALMATY. QazAqparat - Almatyda eldi aldap, alaıaqtyqpen aınalysqan erli-zaıypty ustaldy, dep habarlaıdy QazAqparat tilshisi Polıtsııa departamentine silteme jasap.

Kúdiktiler ınternet arqyly jarnama jasap, bireýdiń senimine kirip, aqshasyn zańsyz ıemdengen.

«Kúdiktiler ınternette «Nesıe alýǵa kómektesemin» degen mazmundaǵy jarnama jarııalaǵan. Potentsııaldy «klıent» habarlasqan kezde alaıaqtar ony ekinshi deńgeıli bankten shot ashyp, oǵan alǵashqy jarnanyń salýly, sosyn ony belgilengen nómirge tirkeýdi aıtyp, sendiredi. Osy aralyqta alaıaqtar alynǵan somany mobıldi bankıng arqyly basqa kartaǵa aýdaryp, qolma-qol aqshaǵa aınaldyrǵan», -deıdi Almaty qalalyq PD Krımınaldyq polıtsııa basqarmasynyń bastyǵy Erkin Іńkárov.

Almaty oblysynda kúdiktilerge aldanǵan 12 jábirlenýshi anyqtaldy. Kúdiktiler ýaqytsha tergeý ızolıatoryna qamalǵan.

Tergeý amaldary jalǵasýda.