Almatyda nemeresimen birge esirtki ósirgen zeınetker ustaldy
Almaty qalalyq Polıtsııa departamentiniń málimetinshe, Alataý aýdanyna qarasty «Áıgerim» yqshamaýdanyndaǵy úılerdiń birinde 76 jastaǵy turǵyn nemeresimen birge qarasora jáne marıhýana ósirgeni anyqtaldy.
«G.esimdi áıeldiń turǵylyqty jeri boıynsha jedel-izdestirý sharalaryn júrgizý barysynda jasyl tústi, erekshe ıisi bar ósimdik tektes 117 buta tabyldy jáne tárkilendi. Sot-medıtsınalyq saraptama qorytyndysyna sáıkes, tárkilengen esirtki – keptirilmegen marıhýana bolyp shyqty, onyń jalpy salmaǵy 6 keli 680 gramm», – dedi Almaty qalalyq Polıtsııa departamentiniń Esirtki qylmysyna qarsy kúres basqarmasy bastyǵynyń orynbasary Saǵyndyq Aıaǵanov.
Onyń aıtýynsha, qazirgi ýaqytta Alataý aýdandyq polıtsııa basqarmasynda kúdiktige qatysty QR QK-niń 300-baby 1-bóligi boıynsha sotqa deıingi tergeý júrgizilip jatyr.
