Almatyda názik jandy polıtsııa qyzmetkerleri qurmetine Qurmanǵazy atyndaǵy orkestr kontsert berdi (FOTO)
ALMATY. QazAqparat - Almatyda Halyqaralyq áıelder kúni qarsańynda názik jandy polıtsııa qyzmetkerleriniń qurmetine Qurmanǵazy atyndaǵy memlekettik akademııalyq halyq aspaptary orkestri kontsert berdi.
Bul týraly búgin Almaty qalalyq ІІD baspasóz qyzmetinen habarlady.
Saltanatty is-shara Almaty qalalyq ІІD ǵımaratynda ótti.
«Búgin aty ańyzǵa aınalǵan, halyqaralyq baıqaýlardyń talaı júldegeri bolǵan orkestr áıel áriptesterimizdiń qurmetine tamasha kontsert berdi. Bizdiń názik jandy polıtsııa qyzmetkerlerimiz ishki ister salasynda erlermen birge ózderine júktelgen jaýapty qyzmetterdi oıdaǵydaı atqaryp keledi. Sonymen qatar olar úıde - aıaýly qaryndas, súıikti jar, meıirimdi ana. Búginde Almaty polıtsııasynda 1 myńǵa jýyq áıel azamattar qyzmet atqarady. Olardyń ishinde tájirıbeli tergeýshiler, jedel ýákilder, krımınalıster bar. Olar keı ýaqytta qyzmettik mindettemelerdi er azamattardan artyq oryndaıdy», - dedi óz sózinde Almaty qalalyq ІІD bastyǵy, general-maıor Serik Kúdebaev.
Merekelik is-shara barysynda áıel polıtsııa qyzmetkerleri QR ІІM jáne Almaty qalalyq ІІD tarapynan Maqtaý gramotalarymen, Alǵys hattarymen jáne «Minsiz qyzmeti úshin» tósbelgilerimen marapattaldy.
«Bul merekelik kúni, ásirese názik jandy ardager áriptesterimizge rızashylyǵymyzdy bildiremiz. Olardyń kópjyldyq eńbegi, baı tájirıbesi jáne kásipqoılyǵy búgingi jas polıtsııa qyzmetkerleri úshin úlgi. Biz Sizderdi maqtan tutamyz. Sizderdiń arqalaryńyzda ómirimiz mándi, maǵynaly, jarqyn da shýaqty, súıispenshilikke toly bola túsedi. Sizderge aıtar alǵysymyz sheksiz. Sondaı-aq, Qurmanǵazy atyndaǵy memlekettik orkestrge de alǵysymyzdy bildire otyryp, shyǵarmashylyq tabystar tileımiz!», - dedi S. Kúdebaev. 
