Almatyda Nazarbaev Zııatkerlik mektebi Qamqorshylyq keńesiniń otyrysy ótti
ALMATY. QazAqparat – Búgin Almaty qalasy ákiminiń orynbasary Erjan Babaqumarovtyń tóraǵalyǵymen Almaty qalasyndaǵy fızıka-matematıka baǵytyndaǵy Nazarbaev Zııatkerlik mektebi Qamqorshylyq Keńestiń otyrysy ótti, dep habarlaıdy QazAqparat tilshisi.
Keńeske «Nazarbaev Zııatkerlik mektepteri» DBBU Basqarma tóraǵasy K. Shámshıdınova men qamqorshylyq keńes músheleri qatysty.
Otyrys barysynda mekteptiń 2019 jyl boıynsha damý qorytyndysy shyǵaryldy, sondaı-aq bilim berý qyzmetteriniń sapasyn odan ári arttyrý, materıaldyq-tehnıkalyq bazany jańǵyrtý jónindegi josparlar qaraldy. Búgingi tańda NZM Almaty fılıalynyń oqýshylary respýblıkalyq jáne halyqaralyq olımpıadalarǵa belsendi qatysady: 600-ge jýyq oqýshy jeńimpaz jáne júldeger atandy, 358-i ǵylymı jarystar men konkýrstarda jeńiske jetti.
Nazarbaev Zııatkerlik mektebiniń bilim berý tájirıbesin qalalyq mektepterge taratý jáne barlyq oqýshylar úshin NZM tehnologııalarynyń qoljetimdiligin arttyrý máselesine erekshe nazar aýdaryldy. Qaladaǵy 23 jetekshi mektep NZM júıesi boıynsha sabaq berýge kóshti. Almaty ákimdiginiń bastamasymen 2019 jyldyń qyrkúıek aıynan bastap pılottyq joba aıasynda NZM standarttary qalanyń 8 shalǵaıdaǵy mektepterinde engizilýde. №7, №195, №186, №193, №184 mektepterde semınarlar, sheberlik jáne ashyq sabaqtar uıymdastyryldy.
Sonymen qatar, fızıka-matematıkalyq, ınjenerlik baǵyttar boıynsha jáne hımııa, robototehnıka, baǵdarlamalaý salasynda jańa IT sheshimderin engizý perspektıvalary talqylandy. Bul sharalar oqýshylardyń básekege qabilettiligin arttyrýǵa jáne eńbek naryǵynyń ózgermeli talaptaryna daıyndaýǵa múmkindik beredi.
Talqylaý qorytyndysy boıynsha ákim orynbasary, Almaty qalasyndaǵy fızıka-matematıkalyq baǵyttaǵy Nazarbaev Zııatkerlik mektebi qamqorshylyq keńesiniń tóraǵasy E. Babaqumarov QR Tuńǵysh Prezıdenti - Elbasy N. Nazarbaev atyndaǵy mektepterde ulttyq bilim berý sapasyn arttyrý úshin barlyq jaǵdaı jasalǵanyn atap ótti.
Sonymen qatar, Qamqorshylyq keńes músheleri mekteptiń kabınettik qory men ǵylymı bazasynyń jumysyn tekserip, zerthanalar, fızıka, hımııa, robototehnıka kabınetteri, oqý telestýdııasy, oranjereıa jáne kitaphanany kórip shyqty.
