Almatyda «Nazar aýdaryńyz - balalar!» atty shara ótip jatyr
ALMATY. Tamyzdyń 31-i. QazAqparat /Názıra Eleýhan/- Almatyda «Nazar aýdaryńyz - balalar!» atty shara ótip jatyr. Onyń maqsaty - balalardy jol-kólik apatynan, balalar ómiri men densaýlyǵyn saqtaý, qala joldaryndaǵy jaǵdaıdy turaqtandyrý bolyp tabylady. Aktsııa qyrkúıektiń 9-na deıin ótedi,
dep habarlaıdy QazAqparat.
Jyl basynan beri balalardyń qatysýymen 202 jol-kólik oqıǵasy tirkelgen. Onda tórt bala kóz jumsa, 206 bala ár túrli dene jaraqatyn alǵan.
«Jol-kólik oqıǵasyna kóbine 7 jas pen 14 jas aralyǵyndaǵy balalar ushyraýda. Qazirgi ýaqytta jol polıtsııa qyzmetkerleri kóshege jaqyn jerlerge ornalasqan qalanyń 180 mektebin tekserýde. Mektep mańyndaǵy kóshelerde tıisti jol belgileriniń bar-joǵy anyqtalýda», dedi Almaty qalasynyń Jol polıtsııasy basqarmasynyń bastyǵy, polıtsııa polkovnıgi Arman Sarbasov. Onyń aıtýynsha, aktsııa barysynda jol polıtsııasynyń quramy júrgizýshiler arasynda túsindirme jumystaryn júrgizitin bolady jáne BAQ quraldary arqyly nasıhat jumystarymen qatar, aldyn alýǵa arnalǵan paraqshalar taratady.
"Sonymen qatar, ár sholǵynshy kólik arnaıy nasıhattaýǵa arnalǵan dıskti qoıý arqyly barlyq kólik júrgizýshilerin jol erejelerin saqtaýǵa shaqyratyn bolady. Ol eń aldymen mektep mańynan abaılap ótýge, jaıaý júrginshi jolynda erekshe nazar aýdarýǵa baǵyttalǵan. Biz sondyqtan, barlyq kólik júrgizýshilerin júrý barysynda kólik jaryǵyn qosyp júrýge shaqyramyz", dedi Arman Sarbasov.
