Almatyda Naýryzbaı aýdandyq ІІB-na jańa ǵımarat berildi
ALMATY. QazAqparat - Almatyda Naýryzbaı aýdandyq ishki ister basqarmasyna jańa ǵımarat berildi, dep habarlaıdy QazAqparat tilshisi.
Jańa nysannyń jabdyqtalýyn qala ákimi Baýyrjan Baıbek tekserdi.
2016 jyly Naýryzbaı aýdandyq ІІB qurylysyna jergilikti bıýdjetten 980 mln teńge bólingen bolatyn.
«Departamenttiń qolǵa alǵan sharalarynyń arqasynda qaladaǵy qylmys kórsetkishi 7 aıda 7,7 %-ǵa azaıdy. Aldyn alý, jedel izdestirý sharalarynyń arqasynda asa aýyr qylmystar - 35,0 %-ǵa, jeńil dárejedegi qylmystar - 5,0 %-ǵa azaıdy. Adam óltirý qylmysy - 8,1%-ǵa, adam densaýlyǵyna aýyr zaqym keltirý - 18,0%-ǵa, qaraqshylyq shabýyldar -34,5%-ǵa, zorlyq kórsetý - 20,9%-ǵa, tonaý qylmysy - 9,7%-ǵa, páterlerdi tonaý - 26,1%-ǵa, alaıaqtyq - 22,8%-ǵa, buzaqylyq 40,8%-ǵa tómendedi. Sonymen qatar, qylmystardy ashý 4,0 %-ǵa artty», - dedi óz sózinde qalalyq ІІD basshysy Serik Kúdebaev. 
ІІD basshysy kórsetken materıaldy-tehnıkalyq qoldaýy úshin Almaty ákimdigine alǵys bildirdi.
Onyń aıtýynsha, bıyl departamenttiń materıaldy-tehnıkalyq jabdyqtalýyna jergilikti bıýdjetten 8 mlrd 589 mln teńge baǵyttalǵan. 
«Búginde departament qajetti quraldarmen 80 paıyzǵa jabdyqtaldy. Bul óz kezeginde túrli qylmystar men quqyqbuzýshylyqtardy ashýǵa septigin tıgizip jatyr. Atap aıtqanda, Naýryzbaı aýdany boıynsha barlyq qylmys túriniń 25,3%-ǵa azaıǵany baıqalyp otyr», - dedi general-maıor Kúdebaev.
