Almatyda Naýryz sán-saltanatymen ótip jatyr - fotoreportaj

ALMATY. QazAqparat- Almatylyqtar Ulystyń uly kúnin bar sán-saltanatymen qarsy alyp jatyr, dep habarlaıdy QazAqparat tilshisi.

Búgin Almatyda tańerteńnen bastap Naýryz meıramyna arnalǵan halyqtyq serýen ótip jatyr. Jalpyqalalyq sharalarǵa myńdaǵan megapolıs turǵyny men qonaqtary qatysýda.

Merekelik shara «Astana» alańynda bastaý aldy. Oǵan Memleket basshysy Qasym-Jomart Toqaev qatysty. Prezıdent barsha qazaqstandyqtardy Ulystyń uly kúnimen quttyqtady.

Basty sahnada kórermender qazaq mádenıetiniń ózindik ereksheligin kórsetetin baraban, daýylpaz ben qobyzdy qoldana otyryp daıyndaǵan teatrlandyrylǵan shoýdy tamashalady.

Teatr qoıylymdarymen qatar retro motıvter, sondaı-aq zamanaýı kompozıtsııalar usynyldy. «Boztorǵaı» balalar hory Naýryz meıramyna arnaıy jazylǵan qazaq jáne orys tilderinde «Beıbitshilik búkil álemde» («Mır vsem mıre») ánin oryndady.

Panfılov, Jibek joly jáne Tóle bı kóshelerinde 50-den astam sáýlet nysandary men qondyrǵy ornatyldy.

Jaıaý júrginshiler kóshelerinde kıiz úıler tigilip, qolóner jármeńkesi, meıramhanalar alleıasy, sýretshiler kórmesi men balalar aımaqtary uıymdastyryldy.

Kóktemniń shýaqty kúninde almatylyqtar ulttyq kıimmen kóshege qydyrýǵa shyqty.

Sonymen qatar, qalada sporttyq oıyndar ótip jatyr. Kez kelgen adam arqan tartý, kir tasy men qoshqar kóterý oıyndaryna qatysyp, baǵaly syılyqtar utyp ala alady.

Aıta keteıik, megapolıste negizgi merekelik sharalar 21-23 naýryz aralyǵynda ótedi.

Qalanyń barlyq aýdandarynda 80-nen astam túrli is-shara josparlanǵan.

21-22 naýryzda Ǵylym Akademııasy ǵımaratynyń aldyndaǵy alańda «Qazaq áýenderi» AQ Nur-Sultan qalasy ártisteriniń qatysýymen kontserttik baǵdarlama uıymdastyrady.