Almatyda Naýryz meıramynda MýzART ánnen shashý shashady
MýzART 23 naýryzda, keshki saǵat 19:00-de «Astana» alańynda úlken baǵdarlamasymen óner kórsetedi.
Al 22 naýryzda qala turǵyndaryn merekelik baǵdarlama kútedi, onda Maqpal Júnisova, Mádına Sádýaqasova, Móldir Áýelbekova syndy ártister, «Renzo», «Melomen», «Aıanat», «Nazar» syndy toptar óner kórsetedi.
Sondaı-aq, almatylyqtardy Túrkııadan, Ázirbaıjan men Qyrǵyzstannan keletin sheteldik mýzykalyq-bı toptary quttyqtaıdy. Sheteldik qonaqtar merekelik kóńil-kúımen bólisýmen qatar, kóktemniń kelýimen ushtasatyn shynaıy túrki merekesin merekeleýdiń óz elderine tán dástúrlerimen tanystyrady.
Jańa jyl ulttyq dástúrdegi halyq serýenderinen bastalady. Onda álemniń 6 elinen kelgen 170 qolóner sheberi de bolady. Túrkııadan kelgen qolónershiler ádemi ydys-aıaq pen shyny áshekeı jasaýdy úıretse, ıakýt zergerleri asyl tastar týraly baıandaıdy. Al qyrǵyz sheberleri erlerge at ábzelderin jasaýdy úıretedi. Buǵan qosa, sheberler qyshqa jáne jibek mataǵa ózbek naqyshyndaǵy oıý-órnek salýdy, áıgili túrikmen kilemin toqýdy úıretedi. Kórmege kelýshiler jańa ǵana ustanyń qolynan shyqqan mýzykalyq aspaptarda oınaı alady. Almaty, Petropavl, Aqtaý men Túrkistannan kelgen sheberler temirden, qyshtan, kıiz ben aǵashtan jasalǵan óz buıymdaryn tanystyrady. Kórmege jibekten, jún men barqyttan tigilgen kıimder qoıylady.
Merekeni uıymdastyrýshylar jastardy da nazardan tys qaldyrmady. «Jastar jyly» aıasynda perfomanstar, ulttyq naqyshtaǵy zamanaýı óner kórmeleri qoıylyp, súıikti ártister óner kórsetedi. Aıta keteri, tórt kúnge sozylatyn mereke kúnderi qala turǵyndary men qonaqtary túrli kontsertter, jármeńkeler men festıvalderdi tamashalaı alady.
Festıvalder Astana alańynda, Panfılov pen Jibek joly kóshelerinde, «Atakent» kórme kesheninde, «Almaty Arena» men «Halyq Arena» sport keshenderi mańynda, sondaı-aq «Suńqar» halyqaralyq shańǵy tramplınderi kesheninde ótedi:
22-23 naýryz - Astana alańy;
21-24 naýryz - Panfılov, Jibek joly kósheleri;
22 naýryz - «Nalyk Arena» Muz aıdyny kesheni;
22 naýryz - «Almaty Arena» Muz saraıy;
22 naýryz - «Atakent» QІYO;
23 naýryz -«Suńqar» Halyqaralyq shańǵy tramplınderi kesheni.
Sonymen qatar, bul kúnderi qalada 60 tonna kóje men baýyrsaq taratylady.
