Almatyda Naýryz meıramynda 60 tonna naýryz kóje men baýyrsaq taratylady
Ákimdik málimetinshe, Almatyda merekeni toılaý 14 naýryzda Kók tóbe saıabaǵy aýmaǵynda ótken «Kórisý kúni» sharasymen bastalǵan.
Negizgi is-sharalar 21 naýryz, tańǵy saǵat 10:00-de Naýryz merekesine arnalǵan sherýden bastalady. Sherý Almaty qalasynyń ortalyq kósheleri – Abaı jáne Abylaı han dańǵyldarynyń boıymen ótip, Tóle bı kóshesine deıin barady. Merekelik is-sharaǵa barlyǵy 500 adam qatysady.
Saǵat 11:00-de «Astana» alańynda «Naýryz-dýman» gala-kontserti ótedi. Ártister sahnada ulttyq jáne álemdik mýzykalyq shyǵarmalardy oryndap, akterlerdiń jáne balalar ujymdarynyń qatysýymen teatrlandyrylǵan mýzykalyq qoıylym kórsetiledi.
22 naýryz, saǵat 17:00-de «Astana» alańynda jas oryndaýshylardyń qatysýymen Zhuldyzdy Almaty kontserti uıymdastyrylady.
21-22 naýryzdaǵy merekelik is-sharalar kezinde qala turǵyndary men qonaqtaryna 60 tonna naýryz kóje men baýyrsaq taratylatyn bolady.
18-24 naýryz aralyǵynda Panfılov jáne Jibek Joly kóshelerinde «Naýryz Fest» is-sharasy ótedi. Bul kúnderi sýretshiler men qolónershilerdiń kórmeleri uıymdastyrylyp, kelýshiler kilem toqý, jibek pen keramıkany boıaý, asyl tastardy kesý, bylǵary, aǵash, shyny jáne sazben jumys isteý tehnologııasymen tanysa alady. Sondaı-aq anımatorlardyń qoıylymdary, halyqtyq karaoke, bıden fleshmob, konkýrstar, estrada juldyzdarynyń qatysýymen jandy daýystaǵy kontsert, syılyqtardyń utys oıyndary, basqa da sharalar ótkizý josparlanýda.
Abylaı han dańǵylynyń aýmaǵynda balalar alańy ornalasady. Bul alańda anımatorlar, tsırk ártisteri, qýyrshaq teatrynyń akterleri óner kórsetedi jáne Murat Mutyrǵanovtyń shoýy men halyq ertegileriniń keıipkerleri qýyrshaqtarynyń qoıylymdary bolady. Sondaı-aq bul alańda oıyn fıgýralary ornatylyp, tanymdyq baǵdarlamalar, otbasylyq jáne balalar oıyndary, estafetalar ótedi.
Arbalarǵa ornalastyrylǵan 10 arnaıy sórede jáne shatyrlarda qolónershilerdiń buıymdary usynylady.
Tóle bı kóshesiniń boıynda (Panfılov kóshesinen Nazarbaev dańǵylyna deıingi aralyq) sport aımaǵy ornalasatyn bolady. Munda «Asyq atý», «Jamby atý», «Arqan tartý», «Qol kúres», «Qazaqsha kúres», «Kókpar tartý», «Toǵyz qumalaq» sporttyq oıyn-saýyq ulttyq jarystaryn ótkizý josparlanǵan.
«Alataý» dástúrli óner teatrynyń aýmaǵynda 21-23 naýryz aralyǵynda ártisterdiń ónerin jáne «Naýryz-dýman» teatrlandyrylǵan spektaklin kórsetý úshin arnaıy sahna ornatylyp, etnoqalashyq uıymdastyrylady. Munda qolónershilerdiń kórmeleri, sheberlik synyptary, fleshmobtar, qýyrshaqtar sherýi, sporttyq jarystar ótedi.
Sonymen qatar, dástúrli túrde qalanyń barlyq aýdandarynda 14-24 naýryz aralyǵynda saǵat 17:00-den 20:00-ge deıin merekelik is-sharalar uıymdastyrylyp, sahnada qazaq mýzykalyq folklorynyń úzdik shyǵarmalary oryndalady.
