Almatyda Naýryz meıramy kezinde terakt uıymdastyrmaq bolǵan kúdikti qolǵa tústi - UQK

NUR-SULTAN. QazAqparat – Almatyda «DAISh» halyqaralyq terrorıstik uıymynyń ıdeologııasyn ustanýshyny qolǵa tústi. Bul týraly QR UQK baspasóz qyzmeti habarlady.

«2020 jylǵy 13 naýryzda Ulttyq qaýipsizdik komıteti jedel-izdestirý sharalarynyń nátıjesinde Almaty qalasynda «DAISh» (Qazaqstanda tyıym salynǵan) halyqaralyq terrorıstik uıymy ıdeologııasyn ustanýshyny ustap, sot sanktsııasymen qamaýǵa aldy. Tutqyndalǵan adam Naýryz meıramyn merekeleý kezinde halyq kóp shoǵyrlanǵan oryndarda terakt daıyndady dep kúdiktelýde. Tergeý is-qımyldary barysynda odan eki jaýyngerlik granata alyndy» delingen habarlamada.

Aıta keteıik, kúdiktige qatysty Qazaqstan Respýblıkasy Qylmystyq kodeksiniń 255 (Terrorızm aktisi) jáne 258 (Terrorıstik nemese ekstremıstik áreketti qarjylandyrý jáne terrorızmge ne ekstremızmge ózge de dem berýshilik) baptary boıynsha qylmystyq ister qozǵaldy. Tergeý jalǵasýda.