Almatyda Naýryz merekesine oraı qandaı mádenı sharalar ótedi
Qala turǵyndary men qonaqtaryn otandyq ártisterdiń kontsertteri, ulttyq jarystar, teatr qoıylymdary men shoýlar kútedi, dep habarlaıdy QazAqparat tilshisi.
Qala ákimdigi baspasóz qyzmetiniń habarlaýynsha, negizgi is-sharalar 21 naýryzda saǵat 11.00-den 17.00-ge deıin Panfılov, Jibek joly jáne Tóle bı kóshelerinde ótedi, onda 50-den astam sáýlet nysandary men qondyrǵy ornatylady. Jaıaý júrginshiler kóshelerinde kıiz úıler tigilip, qolóner jármeńkesi, meıramhanalar alleıasy, sýretshiler kórmesi men balalar aımaqtary uıymdastyrylady.
Panfılovpen Qarasaı batyr kóshesindegi shaǵyn sahnada saǵat 11.00-17.00 aralyǵynda kontserttik baǵdarlamamen P. Chaıkovskıı atyndaǵy Almaty mýzykalyq kolledjiniń stýdentteri, balalar shyǵarmashylyq ujymdary, dıdjeıler men ınteraktıvter, Dıana Sharapova mektebi jáne Murat Muturǵanov óz ónerlerin kórsetedi.
Jibek joly kóshesindegi sahnada saǵat 11.00-17.00 aralyǵynda «Almaty Áýenderi», «Boztorǵaı» Halyqaralyq balalar festıvali kontserttik baǵdarlamasyn usynsa, dıdjeıler men ınteraktıvter jáne shyǵarmashyl jastar óz ónerlerin ortaǵa salady.
«Alataý» dástúrli óner teatrynyń aldyndaǵy alańda saǵat 12.00-den 17.00-ge deıin kontserttik baǵdarlama, ulttyq dástúrler kórsetilimi uıymdastyrylady, saǵat 16.00-den keshki kontsert bastalady.
Qalanyń negizgi kontserti 21 naýryz kúni saǵat 12.00-de QBTÝ ǵımaraty aldyndaǵy «Astana» alańynda ótedi. Kórermenderge qazaq mádenıetiniń ózindik ereksheligin kórsetetin barabandar, daýylpazdar men qobyzdardy qoldana otyryp teatrlandyrylǵan shoý usynylady.
Osy is-shara úshin arnaıy zamanaýı óńdeýde mýzykalyq etno-folklorlyq kompozıtsııa jazyldy. Merekelik kontsertke barlyǵy 500-den astam ártis qatysady. Sonymen qatar, sahnada 100-den astam adam óner kórsetedi.
Qoıylymda Álibek Dinishev, Roza Rymbaeva, Jámıla Serkebaeva, Rýhııa Baıdúkenova, Tamara Asar, Parvız Nazarov, Sıtora, Dılnaz Ahmadıeva, Dıana Sharapova, DınaıA, Ardaq Balajanova, Aıgúl Elshibaeva, Aıgúl Qosanova, Erlan Rysqalı, Erbolat Chaldybekov, Ardaq Balajanova, Álı Oqapov, «KeshYou», «Blokbaster» shoý-baleti, dombyrashylar ansambli, «Saltanat» bı ansambli, «Saryn» toby, «Filigram» shekti aspaptar kvarteti jáne taǵy basqalary qatysady.
Teatr qoıylymdarymen qatar retro motıvter, sondaı-aq zamanaýı kompozıtsııalar usynylady.
«Boztorǵaı» balalar hory Naýryz meıramyna arnaıy jazylǵan qazaq jáne orys tilderinde «Beıbitshilik búkil álemde» («Mır vsem mıre») ánin oryndaıdy.
21-22 naýryzda Ǵylym Akademııasy ǵımaratynyń aldyndaǵy alańda «Qazaq áýenderi» AQ Nur-sultan qalasynyń ártisteriniń qatysýymen kontserttik baǵdarlama uıymdastyrady.
Sonymen qatar, merekelik kontsertter qalanyń ár aýdanynda ótedi:
- Almaly aýdanynda 22 naýryz kúni saǵat 12.00 – 17.00 aralyǵynda M. Gandı atyndaǵy parkte;
- Áýezov aýdanynda 21 naýryzda saǵat 11.00-15.00 aralyǵynda Áýezov aýdany ákimdiginiń aldyndaǵy alańda;
- Alataý aýdanynda 22 naýryzda saǵat 11.00-14.00 aralyǵynda «Alataý» DÓT aldyndaǵy alańda;
- Bostandyq aýdanynda 21 naýryz kúni saǵat 11.00-13.00 aralyǵynda «MEGA Center» SOO amfıteatrynda;
- Jetisý aýdanynda 21 naýryz kúni saǵat 11.00-14.00 aralyǵynda «Gúlder» saıabaǵynda;
- Medeý aýdanynda «Ulystyń uly kúni – Naýryz» baǵdarlamasy 20 naýryz kúni saǵat 11.00-15.00 aralyǵynda QR Ǵylym akademııasynyń aldyndaǵy alańda;
- Túrksib aýdanynda – «Kóktem shaqyrady» baǵdarlamasy 20 naýryz kúni saǵat 12.00-15.00 aralyǵynda S. Seıfýllın atyndaǵy parkte;
- Naýryzbaı aýdanynda 21 naýryzda saǵat 11.00-15.00 aralyǵynda Abaı dańǵylynda (Alataý kóshesinen Taraz kóshesine deıin).
Ákimdik mereke kezinde qaýipsizdikti qamtamasyz etý jáne qoǵamdyq tártipti saqtaý úshin kúsheıtilgen rejımge kóshetinin atap ótedi. Qala kóshelerinde merekelik is-sharalar barysynda qajet bolǵan jaǵdaıda quqyq qorǵaý organdary tekserýler júrgizedi, onyń ishinde tyıym salynǵan zattardy alyp júrýdi anyqtaý úshin.
Ákimdik qala turǵyndary men megapolıs qonaqtarynan qabyldanyp jatqan sharalarǵa túsinistikpen qaraýdy suraıdy.
