Almatyda Naýryz merekesine arnalǵan kórme ashylady

Kórmege  Qazaqstannyń qazirgi zamanǵy sýretshileriniń 120 astam avtorlyq jumystary, jeke kollektsııalary, qazaq halqynyń tarıhynan, mádenıetinen, salt-dástúri men turmysynan syr shertetin gobelen, aǵash, qysh, kıizden jasalǵan týyndylar,  sondaı-aq, keskindemelik sýretter men músinder qoıylatyn bolady.

Kelýshiler nazaryna «Jádigerlikter dúkeni» antıkvarlyq salony alǵash ret uly sheber, qazaqtyń beıneleý óneriniń negizin qalaýshy Ábilhan Qasteevtiń kópshilikke belgisiz jumystaryn qoıyp, tuńǵysh ret kórme qonaqtaryna tanysýǵa múmkindik bermek. Al «Antıkvar» salony kórmege grýzın sýretshisi Kandarelı Gıvı Lýarsabovıchtiń (1933-2006)  «Jylqyǵa quraq salý», «Jaılaýdaǵy baqtashy», «Qyz qýý» atty  gobelenderin, sonymen qatar, reseılik sýretshiler, Lenıngrad keskindeme mektebiniń jarqyn ókilderi Albert Belıavskıı men Vladıslav Levanttyń (1931-1978) «Baıanaýyl. Báıge» jáne «Baıanaýyl» atty jumystaryn usynbaq. Sondaı-aq, kórmege qatysatyn «Antika» salony qazirgi zamanǵy qazaqstandyq sýretshilerdiń músindik jáne  keskindeme týyndylaryn  usynatyn bolady. 

Shara barysynda Qurmanǵazy atyndaǵy Qazaq Ulttyq konservatorııasynyń folklorlyq-etnografııalyq toby óner kórsetip, T. Júrgenov atyndaǵy Qazaq Ulttyq óner akademııasy men O. Tańsyqbaev atyndaǵy sándik-qoldanbaly óner kolledji sán kıimderi úlgilerin kórsetetin bolady.