Almatyda Naýryz merekesi Astana alańy men Atletıkalyq aýylda toılanady
ALMATY. QazAqparat - 22 naýryzda Almatyda Ulystyń uly kúni eki jerde - Astana alańynda jáne Atletıkalyq aýylda toılanady, dep habarlaıdy «QazAqparat» HAA tilshisi qalalyq ákimdiktiń baspasóz qyzmetine silteme jasap.
Astana alańyna kıiz úıler, ár túrli qostar, shatyrlar tigilip, Naýryz merekesine saı ınstallıatsııalar ornatylmaq. Meıramda «Múshel» degen taqyryppen teatrlandyrylǵan kórinis kórsetilip, qazaqtyń kóneden kele jatqan salttary, jyr aıtý dástúrleri - «Samalyq», «Túlik jyry» ánderi oryndalady.
Qala ákimdigi baspasóz qyzmetiniń málimetine súıensek, merekelik qoıylym ótetin alań tutastaı bezendiriledi. Úlken sahnadan mándi de kóńildi sharalardy, án-bı men teatrlandyrylǵan qoıylymdy jınalǵan jurtshylyqtyń bári kóre alady.
Al Atletıkalyq aýyldaǵy merekelik qoıylym jańa qonystaǵy qazaq aýylyn elestetedi. Alańnyń kireberisine ejelgi úlgidegi qaqpa ornatylyp, onyń eki jaq shetine kóne kúıme ústine tigilgen eki kıiz úı qoıylady. Mereke ótetin alańǵa «shamdal», «qos», «kóne saýda arbalary», «tańbaly tastar», «tarıh tegershigi» atty ınstallıatsııalar jáne ulttyq nyshandaǵy ár túrli músinder qoıylady.
Ulystyń uly kúni merekesinde Ramazan Stamǵazıev, Nurjan Janpeıisov, Tileýles Qurmanǵalıev, Erkin Shúkiman, Aıgúl Qosanova syndy qazaqtyń aıtýly ánshileri, N. Tilendıev atyndaǵy «Otyrar sazy» folklorlyq-etnografııalyq orkestri, «Qońyr», «MýzArt», «Alashuly» toptary, Aıqyn, Álı Oqapov,Móldir Áýelbekova, Marjan Arapbaeva sııaqty tanymal estrada juldyzdary óner kórsetedi.
