Almatyda "Naýryz - mádenıet pen órkenıetti jaqyndastyrý nyshany" atty taqyrypta "dóńgelek ústel" bolyp ótti

dep habarlaıdy QazAqparat.

Halyqaralyq Bıznes ýnıversıteti, Qazaqstan halqy Assambleıasy men «Nur Otan» partııasy jáne «Etnos forým» qorynyń uıymdastyrýymen ótken otyrys jumysyna BUU, EQYU, Reseı, AQSh, Úndistan, Ulybrıtanııa, Frantsııa, Ispanııa, Iran, Koreıa, Pákistan, Aýǵanstan, Túrkııa jáne taǵy da basqa Qazaqstandaǵy shet el elshilikteriniń ókilderi, Almaty qalasynyń ákimshiligi, sondaı-aq Qazaqstan halqy Assambleıasynyń músheleri qatysty.

Jıyn barysynda halyqaralyq uıymdar men dıplomatııalyq ókildikterdiń jetekshileri jınalǵandardy Naýryz merekesimen quttyqtap, bıylǵy jyly Birikken Ulttar Uıymy Naýryzdy halyqaralyq mereke dep jarııalaǵanyn atap ótti. Qatysýshylar «Halyqaralyq birlestiktiń mundaı qadamy halyqtar arasyndaǵy dıalogtyń damýyna yqpal etip, álemniń qaýipsizdigi men onyń turaqty túrde qalyptasýyna úlken úles qosty», dedi. Olardyń aıtýynsha, BUU - nyń bul sheshimi shyǵys halyqtarynyń uzaq ǵasyrlyq tarıhy bar dástúrin syılaǵandyǵyn kórsetedi.

«Bıyl Naýryz merekesi álemdik deńgeıde atap ótiledi. BUU-nyń Naýryzdy Halyqaralyq mereke dep jarııalap, qarar qabyldaýy - Qazaqstan úshin ǵana emes, Ortalyq Azııa halyqtary úshin de úlken qýanysh. Naýryz merekesi - tabıǵattyń jańarý kezi ǵana emes, alaýyzdyq pen jaýgershilikti toqtatatyn, adamdardy birlikke, dostastyqqa shaqyratyn mereke», dedi «Túrkııa» qoǵamdyq birlestiginiń ókili Qazaqbaı Qasymov.

Dóńgelek ústel otyrysy barysynda sondaı-aq Naýryz meıramynyń róli, ulttyq merekelerdiń jastardyń rýhanı-adamgershilik tárbıesindegi mańyzy, jahandaný úderisinde mádenıetti saqtaý, búgingi álem jaǵdaıynda mádenıetterdiń qarym-qatynasy men baılanysy, polıetnostyq jáne mýltımádenıetti qoǵamdaǵy memlekettiń saıasaty talqylanyp, jıyn sońynda úndeý qabyldandy.