Almatyda Naýryz kúni Atletter aýylyndaǵy páterler berildi
ALMATY. QazAqparat - Naýryz merekesinde «Ýnıversıada murasy» aıasynda Almaty ákimi Baýyrjan Baıbek Atletter aýylynda páter men sertıfıkattar tapsyrdy, dep habarlaıdy QazAqparat tilshisi.
Páter alý kezeginde turǵan 2 myńnan astam almatylyq otbasy Memleket basshysynyń tapsyrmasy boıynsha salynǵan bolashaǵy zor jańa yqsham aýdan turǵyndaryna aınaldy, olardyń arasynda 1 jáne 2 top múgedekteri, jetimder, ata-ana qaraýynsyz qalǵan balalar, soǵys jáne eńbek ardagerleri, kóp balaly jáne tolyq emes otbasylar, dárigerler, muǵalimder jáne basqalary bar. Satyp alynatyn arendalyq páterdiń bir sharshy metriniń quny 1036-dan 1126 teńgeni quraıdy, jalǵa berý merzimi 20 jyl.
«Ótken jyly áleýmettik jaǵynan az qorǵalǵan 3 myńnan astam otbasy jańa páter aldy. 2017 jyly 3200-den astam almatylyq jańa qonysqa ıe bolady, solardyń 1700-den astamy búgin páter kiltterin aldy. Dúnıejúzilik Ýnıversıada chempıondaryna esik ashqan jerge jańa qonystanýshylar keldi. Memleket basshysynyń tapsyrmasy boıynsha «Ýnıversıada murasy» aıasynda 140 myńnan astam orgtehnıka, atletter aýylyndaǵy arnaıy qondyrǵylar 500 áleýmettik mekemelerge taratyldy. 700 myńnan astam arnaıy sporttyq jáne kásibı qondyrǵylar qalanyń sport mektepteri men áleýmettik nysandaryna berildi», - dedi Baýyrjan Baıbek.
Atletter aýylynyń aýmaǵy 23 gektardan astam, munda 14 úı salynǵan. Vıdeo baqylaý, órt qaýipsizdigi qarastyrylǵan. Bul keshende HQKO, emhana, sýpermarket, bank, poshta bólimsheleri men polıtsııanyń tirek pýnkti jýmys isteıdi. Qurylys kezinde tek otandyq materıaldar paıdalanyldy.
