Almatyda Naýryz: Qazaqstan halyqtarynyń birligi ulyqtaldy
ALMATY. QazAqparat - Qazaq memlekettik qyzdar pedagogıkalyq ýnıversıteti Ulystyń uly kúni - áz-Naýryz meıramyn atap ótti. Kıeli qara shańyraqta ótken Ulys toıynda eń basty erekshelik ultaralyq tatýlyq bıik deńgeıde kórinis taýyp, «Birlik bizdiń qasıetti týymyz» degen uranmen el yntymaǵy ulyqtaldy.
Oqý ornynyń stýdentteri men ujymy Qazaqstandy mekendegen ártúrli ulys ókilderiniń salt-dástúrin, mádenıetin, ulttyq qundylyqtaryn sahnalanǵan kórinispen kórsetti.
Kórme uıymdastyryp, túrli ulttyń taǵamdaryn qoıyp, onyń mán-mańyzyn ashyp berdi. Ár fakýltet te ózderine tıesili ulttyń ózgeshelikterin kórsetip, «Aq shatyr» jazǵy alańynda óner dodasyna tústi.
Qazaqstandy ortaq otany sanaǵan orys, bashqurt, qyrǵyz, tatar, uıǵyr, belarýs, ázirbaıjan, ýkraın, nemis, tájik, dúngen, grýzın, úndis, arab, káris, ózbek, grek syndy kóptegen ulttyń ádet-ǵurpyn tanystyryp, ónerlerin kórsetý jalpyýnıversıtettik kólemde bıyl birinshi ret ótkizilip otyrǵanyn aıta ketý kerek. Buǵan Elbasy N.Á. Nazarbaevtyń «Bir halyq bir el bir taǵdyr» degen bastamasy muryndyq bolyp otyr.
«Qyzdar ýnıversıtetin kópultty Qazaqstannyń «kishkentaı nusqasy» dep ataýǵa ábden bolady. Óıtkeni, qazirgi ýaqytta oqý ornynda 500-ge jýyq ózge ult ókili bilim alyp jatyr. Sondyqtan da bıylǵy Ulystyń Uly toıyn «Birlik bizdiń qasıetti týymyz» dep alǵandy jón kórdik. Qoı jylyn shyǵaryp salyp, mereıli Meshin jylyna qadam bastyq. Qoı jylynda Qazaq handyǵynyń 550 jyldyǵyn dúıim jurtqa saýyn aıtyp, dúrkirete toıladyq, QR Konstıtýtsııasy men Qazaqstan halqy assambleıasynyń 20 jyldyǵyn, Uly Jeńistiń 70 jyldyǵyn bıik deńgeıinde atap óttik. Qoı jyly Qyzdar ýnıversıtetine de qambaly, qadirli jyl boldy desek qatelespeımiz. Máselen, byltyrǵy jyly Qazaq memlekettik qyzdar pedagogıkalyq ýnıversıteti respýblıkadaǵy eń úzdik pedagogıkalyq oqý ordasy atandy. Elimizdegi joǵary oqý oryndary arasyndaǵy eń úzdik «top-20» ýnıversıtet ishinde 7 oryndy ıemdendi. Sonymen qatar, taǵy da «Sala kóshbasshysy» bolyp tanyldy. «Munyń barlyǵy Qyzdar ýnıversıteti úshin Qoı jylynyń berekesi men merekesi, jetistigi men jemisi kóp bolǵanyn aıǵaqtaıdy», - deıdi ýnıversıtet rektory Dınar Nóketaeva.
Ulys kúnin toılaý odan ári «Ulys toıdyń aty, Naýryz aıdyń aty» atty merekelik kontsertpen jalǵasyn tapty. Talshybyqtaı buralǵan burymdy qyzdar tógiltip turyp kıgen qazaq kóılekterinen zamanaýı sán úlgisin kórsetip, «Naýryznama» sahnalyq kompozıtsııasymen kórermendi tánti etti.
Ýnıversıtet aýmaǵynda «toǵyzqumalaq», «asyq atý», «qalpaq atý», «shahmat» tárizdi túrli oıyndar oınatylyp, ıgi shara aıasynda elimizdiń birligin aıǵaqtaıyn kórkemsýret jáne qolóner buıymdarynan kórme ótti.
Ulystyń uly kúnindegi ulttyq taǵam Naýryz kóje taratylyp, dastarhan jaıyldy.
