Almatyda Naýryz: qala syrtyndaǵy kókmaısada 40 kıiz úı tigildi (FOTO)
ALMATY. QazAqparat - Almatylyqtar Naýryzdy toılap jatyr. Qala syrtyndaǵy kókmaısada 40 kıiz úı tigildi.
Meıramdy «Kazka» kásipkerler qaýymdastyǵy, Almaty bıznes qaýymdastyǵy, «Tamshy» ǵylym-bilim qory uıymdastyrdy.
«Naýryzdy úsh jyldan beri osylaı aýqymdy atap ótip kelemiz. Ol kezde 15 kıiz úı tigetinbiz. Búgin úılerdiń sany 40-qa jetti. Merekege qonaq retinde kelgen kásipkerlerdiń ózderi úı tigip jatyr. Bir qyzyǵy, kirgen adamdar qansha tóleý kerek dep suraıdy. Qazaqtar óte qonaqjaı halyq. Qonaq kútý - bizdiń dástúrde bar», - dedi «SPSE Kazakhstan» dırektory Jánibek Ahashev.
Jaılaýda ótken merekede ár uıym dastarhannyń baılyǵy men úıdiń eńseliligi boıynsha básekelesti desek artyq bolmas.
Kelýshiler osydan birneshe ǵasyr burynǵy qazaqy aýylǵa kelgendeı boldy.
Ulttyq taǵamdardan bólek olar arqan tartý, toǵyzqumalaq, kókpar, qazaqsha kúresten baq synasty.
