Almatyda naýqastardy onlaın qabyldaý jalǵasýda
ALMATY. QazAqparat – Almatydaǵy №5 qalalyq emhananyń jalpy tájirıbe dárigeri Laýra Maldybaeva naýqastardy onlaın rejımde qabyldaý jáne keńes berý jalǵasatynyn aıtty, dep habarlaıdy QazAqparat tilshisi.
Onyń aıtýynsha, qaladaǵy emhanalarda onlaın-keńes berý maýsym aıynan bastap iske qosylǵan. Eki jarym aıdyń ishinde №5 emhanada 3 myńnan astam onlaın-keńes berildi. Habarlasqan naýqastar ásirese dene qyzýynyń kóterilýine, basynyń, keýde tusynyń aýyrýyna, dıareıaǵa shaǵymdanǵan.
«Halyqtyń qaýipsizdigi úshin emhanalarǵa kelý shekteldi. Jergilikti dárigerler óz naýqastarymen ınternet arqyly baılanys ornatty. Tipti, naýqastarǵa tegin dári-dármekti úılerine deıin jetkizip berýde»,– dedi Laýra Maldybaeva onlaın-brıfıng barysynda.
Sonymen qatar, ol qazir karantın sharalary jeńildetilip jatqanymen, saqtyq sharalaryn áli de qatań ustaný kerektigin tilge tıek etti.
«Maska taǵyp, áleýmettik qashyqtyqty saqtaý qajet. Odan bólek, 65 jastan asqan adamdarǵa kóshege shyǵýǵa jáne emhanaǵa barýǵa áli de shekteý bar. Olar emhanadan onlaın keńes ala alady»,– deıdi Laýra Maldybaeva.
