Almatyda nárestelerdi durys tamaqtandyra bilýdiń kókeıtesti máseleleri talqylandy
ALMATY. 28 naýryz. QazAqparat - Búgin Almatyda "Nárestelerdi tamaqtandyrýdaǵy kókeıtesti máseleler" degen taqyrypta konferentsııa bolyp ótti.
Atalmysh shara Nestle kompanııasynyń júzege asyryp jatqan "Sábıdiń saýlyǵy - alǵashqy kúnnen" dep atalatyn baǵdarlama sheńberinde ótkizildi.
«Qazaqstanda durys tamaqtanbaý saldarynan bir jasqa tolmaǵan balalardyń densaýlyǵy jıi syr berip jatady. Búgingi konferentsııa osy ózekti máselege arnalady», - deıdi sharanyń uıymdastyrýshylary.
Konferentsııa jumysyna Qazaqstandaǵy tanymal nýtrıtsıolog-dáriger, Qaraǵandy memlekettik medıtsına ýnıversıteti taǵamtaný kafedrasynyń dotsenti Svetlana Ahmetova, sondaı-aq, 200-den astam bala dárigerleri qatysty.
«Bizdiń kompanııa álemde ana men balanyń tamaqtaný máselelerine erekshe kóńil bólip kele jatqan kompanııalardyń biri bolyp tabylady. Biz bala úshin ana sútiniń tabıǵat syılaǵan baǵa jetpes qorek ekendigine shúbá keltirmeımiz jáne ata-analardyń deni saý urpaq tárbıeleýine kómektesý úshin barymyzdy salyp kelemiz. Búgingi tańda ata-analarǵa salaýatty urpaq tárbıeleý, olardy durys tamaqtandyrý jóninde aqyl-keńester aýadaı qajet. Olar ana sútiniń artyqshylyqtaryn uǵynyp, balalarynyń durys tamaqtanýyna jaǵdaı jasaýy tıis», -dedi konferentsııa barysynda Nestle kompanııasy Eýrazııa aımaǵyndaǵy bólimshesiniń jetekshisi Dárııa Aıtmuqanova.
Qaraǵandy memlekettik medıtsına ýnıversıteti taǵamtaný kafedrasynyń dotsenti, nýtrıtsıolog-dáriger Svetlana Ahmetova: «Balaǵa qajettiniń bárin, barlyq dárýmender men paıdaly zattardy "taza" kúıinde ana sútinen ǵana tabýǵa boldy. Ana súti týǵannan keıin balanyń 6 aı boıy durys jáne tolyqqandy tamaqtanýyn qamtamasyz ete alady. Biraq, ókinishke oraı ómirde balany tabıǵı jolmen qorektendirýge múmkindik bolmaı qalyp jatatyn kezder de az kezdespeıdi»,- dedi.
Uıymdastyrýshylardyń aıtýynsha, "Sábıdiń saýlyǵy - alǵashqy kúnnen" dep atalatyn baǵdarlamanyń amerıkandyq nusqasy - Nestle Start Healthy, Stay Healthy baǵdarlamasy 2004 jyly Gerber brendiniń bastamasymen ázirlengen. Baǵdarlamany iske asyrý barysynda ǵalymdar men medıtsına salasyndaǵy mamandar ata-analar arasynda saýalnama júrgizip, sábılerdi tamaqtandyrýdyń ózekti problemalaryn anyqtaǵan. Saýalnama sondaı-aq, jas náresteler ratsıonynyń durys eseptelmeıtinin jáne ata-analardyń balalar taǵamyna nemquraıly qaraıtynyn kórsetip bergen. "Sábıdiń saýlyǵy - alǵashqy kúnnen" baǵdarlamasynyń tujyrymdamasyna súıensek, durys tamaqtaný daǵdysy bala týmaı turyp, ıaǵnı júktilik kezinde qalyptasady. Sondyqtan da onda júkti áıelderdiń tamaqtanýyna qatysty aqyl-keńester toptastyrylyp, balanyń durys ósip-jetilýi úshin mańyzdy taǵam túrleri týraly tolyq sıpattama berilgen.
QR Statıstıka agenttiginiń málimetterine súıensek, Qazaqstanda 6 aıǵa tolmaǵan sábılerdiń 32 paıyzy ǵana tek ana sútimen qorektenedi eken. Bir jasqa deıingi sábıler arasynda tek ana sútimen qorektenetinder sany 51 paıyzdy (2006 jyly 57% bolatyn), al 2 jasqa deıingi balalar arasynda - 26 paıyzdy (2006 - 16%) quraıdy. Nárestelerdiń 48 paıyzy 6-8 aıynda qatty, jartylaı jumsaq jáne jumsaq taǵamdardy jeı bastaıdy. «Sábı aǵzasyna beıimdelmegen taǵamdarmen qorektenetin balalardyń boıynda allergııalyq reaktsııa jıi baıqalady. Al ana súti demikpe, atopıkalyq dermatıt, otıt, as qorytý joldary jáne ózge de syrqattardyń aldyn alýǵa kómektesedi», - deıdi mamandar.
Búginde kópshilik arasynda 6 aıdan keıin balalarǵa "úlkender jeıtin taǵamdardy" bergen paıdaly degen pikir qalyptasqan. Mamandar bolsa, 12 aıǵa deıin balalar negizinen ana sútimen qorektenýi tıis degen ortaq pikirge kelip otyr. Óıtkeni, ana súti balanyń ımmýnıtetin qalyptastyrýda mańyzdy ról atqarady.
