Almatyda nan – 75 teńge, kartoptyń kelisi – 98 teńgeden satylyp jatyr

ALMATY. QazAqparat - Áleýmettik mańyzy bar azyq-túlik taýarlarynyń baǵasyn turaqtandyrý máselesi Almaty ákimdiginiń erekshe baqylaýynda. Bul týraly Almaty qalasy kásipkerlik jáne ınvestıtsııalar basqarmasy basshysynyń orynbasary Damır Tazabek QazAqparat tilshisine aıtyp berdi.

- Damır Aqanǵalıuly, Almatyda azyq-túlik baǵasyn kótermes úshin qandaı jumys atqarylyp jatyr?

- Almaty qalasynyń azyq-túlik qaýipsizdigin qamtamasyz etý, sondaı-aq, áleýmettik mańyzy bar azyq-túlik taýarlary baǵasynyń negizsiz ósýine jol bermeý úshin qala ákimdigi birqatar keshendi jáne jedel sharalar qabyldaýda.

Máselen, jeńildetilgen qaryz berý arqyly qalany azyq-túliktiń 19 túrimen turaqty baǵamen qamtamasyz etý jalǵasyp jatyr.

Oǵan «Magným» jáne «Toımart» saýda jelileri, sondaı-aq, iri nan («Aqsaı «HBK» JShS), sıyr eti («Asyl Meat» JShS), jumyrtqa («Alsad» JShS) jáne qant («AqsýQant»JShS) óndirýshileri tartyldy.

Qalanyń 7 negizgi azyq-túlik bazarynda (Jasyl bazar, Jańa Aqbulaq (kóterme saýda), Sary-Arqa, Tastaq, Taýsamaly, Almaty-1, Túrksib) «Áleýmettik dúkender» jumys isteıdi.

Onda 10 túrli taýar (kartop, sábiz, pııaz, qyryqqabat, qant, qaraqumyq, kúnbaǵys maıy, kúrish, rojkı, un) satylady. Tirkelgen baǵa ortasha naryqtyq baǵadan 5-40% tómen.

Almaty qalasy men Almaty oblysynyń óńiraralyq kooperatsııasy sheńberinde memorandýmǵa qol qoıylyp, sút, súzbe jetkizý boıynsha shart jasaldy («JLC Sút» JShS).

Qalanyń saýda jelilerine taýyq etin («Alataý Qus» JShS), pııazdy («Naz-Dana» ShQ, «Agrofırma» TJN ı K» JShS), sıyr etin jáne sút ónimderin («Dınara Ranch1 JShS), kúrishti («Agrofırma Birlik» JShS, «Tamshy-bulaq» JShS, «Dınara Ranch» JShS) jetkizý qosymsha pysyqtalyp otyr.

- Almatyda áleýmettik mańyzy bar azyq túliktiń shamamen qazirgi tómengi baǵasy qalaı?

- Tómengi baǵa ónimniń túrine baılanysty. Mysaly, áleýmettik nannyń tómengi baǵasy – 75 teńge bólke úshin, kartop – 98 teńge/kg, sút (2,5%) - 230 teńge/l.

- Qala bazarlarynda, saýda úılerinde, sýpermarketterde azyq-túlik baǵasyna monıtorıng júrgizile me?

- Almaty naryǵyndaǵy baǵanyń ósýine jedel áreket etý úshin saýda jelilerinde, bazarlarda, «úı janyndaǵy» dúkenderinde apta saıyn baǵalarǵa monıtorıng júrgiziledi. Monıtroıng barysynda satýshylarmen 15% saýda ústemesin saqtaý qajettiligi týraly túsindirý suhbattary júrgiziledi.

- Satýshylarmen azyq-túlik baǵasyn kótermeý boıynsha is-sharalar júrgizile me?

- Baǵany memlekettik retteý sharalary sheńberinde jyl basynan bastap 3 shekti baǵa belgilendi. Máselen, qalada qaraqumyq jarmasyna (361 tg/kg, 30 naýryzǵa deıin), jumyrtqaǵa (487 tg/ondaǵan, 30 maýsymǵa deıin) jáne qyryqqabatqa (83 tg/kg, 15 qyrkúıekke deıin) shekti baǵa belgilengen, shekti baǵalardyń qoldanylý kezeńinde Almaty qalasynyń aýmaǵynda asyp ketýler tirkelgen joq.

- Suhbatyńyzǵa rahmet.