Almatyda mysyqtardyń halyqaralyq kórmesi ótýde
ALMATY. Qazannyń 16-sy. QazAqparat /Erbol Turymbetov/ - Búgin Almatyda «Mysyqtar álemi» Almaty felınologııalyq ortalyǵy (WACC) qoskúndik Halyqaralyq mysyqtar kórmesin ashty.
Kórmege mysyqtardyń 18 túrinen 100-ge jýyǵy ótinish bildirgen. Olardyń ishinde persııalyq, meın-kýn, neva maskarady, norveg ormany, shotland salpańqulaǵy, haılend-fold, bengaldyq, kornısh-reks, orys kógildiri, abıssındik, sıamdyq, orıentaldyq, peterbold, don jáne kanada sfınksteri bar. Mysyqtardyń tek saraptamalaryn ótkizýge Germanııa men Reseıden halyqaralyq dárejedegi sarapshylar shaqyrylǵan.
Mysyqtardyń kásibı konkýrsynan bólek kórme baǵdarlamasynda eresekter men balalarǵa arnalǵan tanymdyq-sergitý baǵdarlamasy da qarastyrylǵan. Onda kórermender mysyqtardyń tekterimen tanysyp, oıyndar, vıktorınalar men mysyqtar qatysýyndaǵy jáne solar týraly teatrlandyrylǵan qoıylymdar kóre alady. Al erteńgi kórmede dekoratıvti qoıandar men kúzender qoıylady.
