Almatyda mýzykalyq jáne horeografııalyq bilim berýdegi máseleler talqylanýda
ALMATY. 3 Qarasha. QazAqparat /Názıra Eleýhan/ -Almatydaǵy K.Báıseıitova atyndaǵy daryndy balalarǵa arnalǵan respýblıkalyq mamandandyrylǵan mýzyka mektebinde (RMMOMI) "Qazaqstan Respýblıkasynda mamandandyrylǵan mýzykalyq jáne horeografııalyq bilim berýdiń tájirıbesi, máseleleri men bolashaǵy" atty respýblıkalyq oqý-ádistemelik semınar ótip jatyr. Semınar elimizdegi mamandandyrylǵan mýzyka mektepteriniń pedagogtaryna arnalǵan.
"Daryn" respýblıkalyq ǵylymı-tájirıbelik ortalyǵynyń uıymdastyrýymen ótip jatqan semınarǵa elimizdiń barlyq aımaǵynan, mamandandyrylǵan mýzyka jáne óner mektepterinen kelgen 300-den asa muǵalimder qatysýda.
Eki kún bolatyn semınar barysynda mýzykalyq jáne horeografııalyq bilim berýdegi ǵylymı-ádistemelik máseleler, oqý úderisiniń sapasy men tıimdiligin arttyrý, oqytýdy jetildirý, sapasyn kóterý, jaǵdaı jasaý, mádenıet jáne óner salasyndaǵy daryndy balalardy oqytý ádisterin uıymdastyrý jáne mazmuny tóńireginde ózekti máseleler talqylanbaq. Shara barysynda RMMOMI jáne A.V.Seleznev atyndaǵy Almaty horeografııalyq ýchılışesiniń jetekshi pedagogtary sheberlik synyptar ótkizetin bolady.
"Bizdiń "Daryn" ortalyǵynyń maqsaty - daryndy balalardy izdep týyp, jumys isteý. Elimizde daryndy balalar kóp, mýzyka salasynda da jeterlik. Olar elimizdegi daryndy balalarǵa arnalǵan mektepterde oqýda. Elimizde ondaı mektepter 107 bolsa, qazir onyń sany artyp otyr, 116-ǵa jetti", -dep atap ótti "Daryn" respýblıkalyq ǵylymı-tájirıbelik ortalyǵynyń dırektory Dildásh Bıtýova.
Onyń aıtýynsha, daryndy balalardy oqytatyn ustazdardy shynyqtyryp, bilimin jetildirip otyrý qajet. "Pán boıynsha ol jolǵa qoıylǵan, al mýzyka, óner jaǵy durys jolǵa qoıylmaı otyr. Búginde Qazaqstanda mýzyka, óner mektepteriniń sany 300. Sonyń ishinde eń úzdik mýzyka mektep osy - K.Báıseıitova atyndaǵy daryndy balalarǵa arnalǵan respýblıkalyq mamandandyrylǵan mýzyka mektebi bolyp tabylady. Sondyqtan bul jerdi bul saladaǵy barsha ustazdarǵa arnalǵan ádistemelik-metodıkalyq kómek beretin ortalyq jasaýdy josparlap otyrmyz. Óıtkeni, qazirgi ýaqytta mýzyka, óner mektepterine arnalǵan ádistemelikterdi, oqýlyqtardy irikteıtin qajettilik týyp otyr, kerek emesin, járamaıtynyn alý kerek. Mınıstrlikte saraptaıtyn mamandar joq. Al, bul ortalyqta qurylatyn Keńes osy jumystarmen aınalysyp, saraptap, baǵdarlamalar jasaıtyn bolady",-dedi ol.
