Almatyda Mýzeı túni aıasynda D. Qonaev mýzeıinde retro stılinde merekelik kontsert ótýde (FOTO)
ALMATY. QazAqparat- Búgin Almatyda Halyqaralyq mýzeıler kúnine oraılastyrylǵan Mýzeı túni aktsııasy aıasynda D. A. Qonaev mýzeıinde erekshe keshendi merekelik shara uıymdastyryldy.
Bul úshin mýzeı aýlasy merekelik sıpatta sándi etip bezendirildi. Aýlanyń tór jaǵyna kishigirim sahna jasaldy, al onyń qasyna qoıylǵan úlken jarnamalyq taqtaǵa keńes zamanyndaǵy plakattar, kıno-kontserttik afıshalar japsyryldy.
«Biz bıylǵy sharany ózindik bir retro stılinde uıymdastyrýdy jón kórdik. Munda eń aldymen Júrgenov atyndaǵy óner akademııasy, J. Elebekov atyndaǵy estrada-tsırk kolledjiniń stýdentteriniń qatysýymen kontsert bolady. Onda halyq ánderimen qatar, Dımash aǵanyń súıip tyńdaıtyn ánderi, keńestik kınofılderdegi ánder shyrqalady. Bıshi qyzdarymyz myń buralyp, ár túrli ulttyq bılerdi oryndasa, bolashaq tsırk artısteri de óz ónerlerin pash etedi. Buǵan qosa, ótken ǵasyrdyń 50-60-shy jyldaryndaǵy stılde merekelik retro-dıskoteka uıymdastyrylady. Sharaǵa qatysty dekoratsııalardy óz kúshimizben jasadyq», - dedi «QazAqparat» tilshisine bergen suhbatynda D. A. Qonaev mýzeıiniń jetekshisi Laýra Beısekova.
Sonymen qatar, ol búgingi shara barysynda keshki saǵat 19:30-dan 23:30-ǵa deıin mýzeıdiń ekinshi qabatynda Dinmuhamed Ahmetulynyń jaqyn týystarynyń qatysýymen, kelgen qonaqtarǵa shaı beriletindigin aıtty.
«Bul kezdesýge Dımash aǵanyń qaryndasy Roza Ahmetqyzy, nemere qaryndasy Jannet Dáýletqyzy jáne nemere inileri kelip, Dımash aǵanyń ómiri men qyzmeti týraly áńgimeleıdi. Mundaı basqosýdyń jastarǵa berer tárbıelik máni óte zor dep bilem. Óıtkeni, kezinde el basqarǵan Dımash Ahmetuly Qonaev úlgi tutarlyq uly tulǵa. Men óz basym Dımash aǵany ýaqyt ótken saıyn jańa qyrynan tanyp, tánti bolyp júremin», - dedi L. Beısekova.
Aıta ketelik, bul keshki shaıǵa aldyn ala jazba boıynsha tirkelgen qonaqtar qatysa alady.
Al jalpy, merekelik shara barysynda kelýshilerdiń legine qaraı mýzeıge ekskýrsııa jasalady jáne Dımash Ahmetuly jaıly arnaıy suraq-jaýap baıqaýy uıymdastyrylady. Onda jeńip shyqqandarǵa mýzeı qyzmetkerleriniń daıyndaǵan syılyqtary tabys etiledi.
Búgin D. Qonaev mýzeıindegi Mýzeı túni sharasy túngi saǵat 23:00-ge deıin jalǵasady. Ony tamashalaýǵa 1 000-nan astam adam keledi dep kútilýde.
Qazir merekelik shara odan ári jalǵasyp jatyr. Ol keshki saǵat 18:00-de bastaldy. 
