Almatyda músinshi Erkin Mergenovtyń "Erkindik" atty mereıtoılyq kórmesi ashyldy
ALMATY. Sáýirdiń 30-y. QazAqparat /Názıra Eleýhan/ -Búgin Almatydaǵy Ortalyq murajaıda QR halyq sýretshisi, Qazaq KSR óneriniń eńbek sińirgen qaıratkeri, belgili músinshi Erkin Mergenovtyń "Erkindik" atty mereıtoılyq kórmesi ashyldy,
dep habarlaıdy QazAqparat.
Kórmege sýretshiniń osy ýaqytqa deıingi barlyq týyndylary qoıylǵan.
«Músinshi Erkin Mergenov bizdiń zamanymyzdyń, elimizdiń ónerin dáripteıtin mádenıet qaıratkerleriniń biri. Onyń jumystary álemniń kóptegen elderinde tanymal. Reseıdiń Tretıakov galereıasyndaǵy, Prıbaltıka, Qyrǵyz, AQSh, Vengrııa, Germanııa murajaılaryndaǵy, Eýropa jáne Azııa elderindegi jeke kollektsııalardaǵy Erkin Mergenovtyń shyǵarmalary qazirgi zamanǵy tanymal sheber ekendiginiń kýási. Onyń shyǵarmashylyǵy ulttyq rýhty, sondaı-aq qazaqstandyq beıneleý ónerine jańa baǵyttar alyp kelýde», deıdi ónertanýshylar.
Kórme mamyr aıynyń 30-na deıin jalǵasady.
Erkin Mergenov - Qazaqstan Sýretshiler odaǵynyń múshesi. Oǵan 1992 jyly QR halyq sýretshisi ataǵy berildi. 2002 jyly «Platınaly Tarlan» syılyǵynyń birinshi laýreaty atandy. Sol jyly Reseıde «ónerde jańa stılder men baǵyttardy qalyptastyrǵany úshin» - A.S.Pýshkın atyndaǵy úlken Altyn medalmen marapattalǵan. 2009 jyly sýretshi týraly «Imena v ıskýsstve» serııasynda monografııa jaryq kórdi. Ótken jyly sýretshiniń jumysy Nıý-kolledjdyń (Oksford. Ulybrıtanııa) kollektsııalaryn tolyqtyrǵan bolatyn. Búginde Erkin Mergenov T.Júrgenov atyndaǵy Óner akademııanyń aǵa oqytýshysy, sýret kafedrasynyń meńgerýshisi.
