Almatyda "Murajaı túni-2010" PR sharasy ótip jatyr
ALMATY. Mamyrdyń 14-i. QazAqparat /Názıra Eleýhan/ - Búgin Almatyda QR Ortalyq memlekettik murajaıdyń esigi barlyq almatylyqtarǵa jáne qala qonaqtaryna aıqara ashyldy. Óıtkeni búgin munda "Murajaı túni-2010" PR sharasy ótip jatyr. Aktsııa túngi 24.00-ge deıin jalǵasady,
dep habarlaıdy QazAqparat.
«Búgingi shara 5-shi mereıtoılyq aktsııa. Biz bul sharany jylda Halyqaralyq murajaılar kúni merekesine oraı uıymdastyryp kelemiz. Mine, dástúrge aınalyp, turaqty ótip keledi. Osy jyldar aralyǵynda bul aktsııa Almaty mádenı kúntizbesindegi negizgi oqıǵalardyń birine aınaldy. Meniń oıymsha, bizdiń murajaı tek ǵylymı, bilim berý ortalyǵy ǵana bolyp qoımaı, demalys orny da bola alady», dedi QR Ortalyq memlekettik murajaıdyń dırektory Nursan Álimbaı. Onyń aıtýynsha, murajaılar kúni merekesi tek murajaı qyzmetkerleriniń merekesi bolmaýy kerek, mádenıet ınstıtýty kimge qymbat, kimge jaqyn jáne Qazaqstannyń mádenı murasyn saqtaý qajet ekendigin túsinetin árbir adamnyń merekesi bolýy qajet.
Dırektor sonymen qatar, «Búgin árbir 300-shi kelýshige arnaıy syılyǵymyz bar» dep atap ótti.
Saǵat 17.00-de bastalǵan sharada barlyq qonaqtarǵa murajaıdyń kórme zaldaryna tegin ekskýrsııalar júrgizilýde. Orta zalda Eskendir Hasanǵalıev, Tamara Asar, Mádına Sadýaqasova, Nurlan Espanov syndy óner juldyzdary, «Aq Marjan», «Saltanat» bı ansambli, ýkraın, túrikmen, kúrdi ulttyq- mádenı ortalyqtary, «Asyl ájeler» hory jáne taǵy da basqa kóptegen ánshiler men bıshiler óner kórsetýde. Batık, keramıka boıynsha kelýshilerge arnalǵan sheberlik dárister de jumys isteýde. Sonymen qatar, qol óner jármeńkesi ótip jatyr.
Shara aıasynda Temir Begimbetovtyń jeke kórmesi ashyldy. Sonymen qatar, músinshi Tileýberdi Bınashev óz týyndylaryn murajaıǵa syıǵa tartty. Sondaı-aq «Qazaqfılmniń» jańa týyndylary jurtshylyq nazaryna usynylýda jáne birneshe kitap dúkenderi óz jańa ónimderin jurtshylyqqa tanystyrýda.
Sharany elimizdiń 20-dan astam kompanııalary qoldaǵan.
Alǵash ret bul aktsııa 1997 jyly Germanııa murajaılarynda ótkizilgen. Odan keıin Eýropanyń jáne Reseıdiń barlyq murajaılary ótkize bastaǵan.
Mádenı shara túngi Almatyǵa ekskýrsııa jasaýmen aıaqtalady.
