Almatyda Murat Mutyrǵanovtyń tsırk stýdııasy ashyldy (FOTO)
ALMATY. QazAqparat - Almatyda belgili tsırk ártisi, QR eńbek sińirgen qaıratkeri Murat Mutyrǵanovtyń tsırk stýdııasy ashyldy. Búgin osyǵan oraı uıymdastyrylǵan arnaıy baspasóz máslıhatynda stýdııa dırektory Murat Mutyrǵanov jańa bilim ordasynyń aldyna qoıǵan maqsattary jóninde áńgimelep berdi.
«Biz balalardy alty jasynan bastap qabyldaı beretin tsırk stýdııasyn ashýdy kópten beri armandap júr edik. Endi mine, soǵan qol jetkizdik. Endi bizdiń stýdııamyzda kez-kelgen bala, tipti múmkindigi shekteýli balalar da oqyp, bilim ala alady. Jalpy, balalardyń barlyǵy da daryndy bolyp týady. Tek ata-analardyń barlyǵy birdeı balasynyń qaı sala boıynsha daryndy ekendigin der kezinde baıqaı bermeıdi. Taǵy bir aıta ketetin jáıt, bizdiń stýdııaǵa eresekterdiń de kelip, tsırk ónerin meńgerýlerine bolady. Árıne, qarjylandyrýsyz stýdııa ashý múmkin emes. Al QR Tuńǵysh Prezıdenti - Elbasy Qory qashanda jastarǵa jáne mádenı jobalarǵa qoldaý kórsetedi. Biz ótken jyly ótinim bergen edik. Bıyl minekı Qordyń grantyna ıe boldyq. Bul qarjyǵa ártúrli qajetti rekvızıtter satyp aldyq. Ázirge ózimizge arnaıy jeke zal tabylǵansha, osy Elbasy Qory ǵımaratynyń bir úlken bólmesinde jumys isteıtin bolamyz. Bizge ol tegin berildi», - dedi M. Mutyrǵanov.
Ol sonymen qatar, alǵashqy kezeńde tegin túrde 10 adamnan turatyn eki top qurylatyndyǵyn aıtty. Olar tańerteń jáne kúndizgi ýaqytta oqıtyn bolady. Al bolashaqta stýdııa túlekterine resmı sertıfıkattar tabys etiledi.
Kezdesý sońynda tsırk stýdııasynyń oqytýshylary men ártisteri kishigirim qoıylym kórsetti.
Aıta ketelik, QR Tuńǵysh Prezıdenti - Elbasy Qory jyl saıyn jas óner qaıratkerleri men shyǵarmashylyq ujymdarǵa granttar bóledi.
Áleýmettik turmys tómen otbasylarynyń balalary Murat Mutyrǵanovtyń tsırk stýdııasynda tegin oqıtyn bolady.
