Almatyda múmkindigi shekteýli jandarǵa medıtsınalyq kómek uıymdastyrý máseleleri talqylandy
ALMATY. 3 naýryz. QazAqparat /Názıra Eleýhan/ - Búgin Almatyda «Qazaqstan Respýblıkasynda múmkindigi shekteýli jandarǵa medıtsınalyq kómek uıymdastyrý problemalary» degen taqyrypta dóńgelek ústel ótti.
Onda múmkindigi shekteýli jandardyń reprodýktıvtik densaýlyǵy men otbasyn josparlaý múmkindigin qamtamasyz etý, perzenthanalyq mekemelerde medıtsınalyq kómek kórsetý deńgeıi men múgedektigi bar qyz-kelinshekterdiń reprodýktıvtik quqyq saýaldary talqylandy.
Jıynda Qazaqstanda múmkindikteri shekteýli adamdardy áleýmettik qoldaý men qorǵaý, olardy ekonomıkalyq, saıası jáne basqa da quqyqtary men erkindikterin júzege asyrýda teń dárejede qamtamasyz etý elimizdiń Konstıtýtsııasymen jáne basqa da normatıvtik-quqyqtyq qujattarmen kepildendirilgen dep aıtyldy. "Biraq, áli de bilim berý, jumyspen qamtý, áleýmettik qorǵaý men medıtsınalyq saýyqtyrý, qoǵamdaǵy ıntegratsııasy, ómir sapasy, reprodýktıvtik densaýlyq salasynda sheshýin tappaǵan máseleler kóptep kezdesedi. Ondaı adamdardyń ómirin jeńildetýge arnalǵan, qoǵamdyq jáne óndiristik ǵımarattarǵa, áleýmettik nysandarǵa jetetin-kiretin joldar, pandýstar, jaıaý ótkinshikter, arnaıy baǵdarshamdar, múgedekter arbasy úshin qondyrǵylar jáne taǵy da basqa da kóptegen qurylǵylar joq. Kemeldengen qoǵamda mundaı máselelerdiń oryn alyp otyrǵandyǵy oılanatyn másele", -dedi Salaýatty ómir saltyn qalyptastyrý problemalary Ulttyq Ortalyǵynyń dırektory Sáýle Dıqanbaeva.
Onyń aıtýynsha, elimizdiń Memlekettik "Salaýatty Qazaqstan" baǵdarlamasynda vedomstvoaralyq jáne sektoraralyq árekettestikti eskere otyryp is-sharalardyń oryndalýyn zańnamalyq, ınvestıtsııalyq, ekonomıkalyq, kadrlyq qamtamasyz etý sharalary qarastyrylǵan. Olar - múmkindigi shekteýli jandardy skrınıngtik qarap-tekserý, áleýmettik mańyzdy aýrýlary bar patsıentterdiń monıtorıngin jetildirý, aqparattyq aǵartýshylyq materıaldardy Braıl tilinde shyǵarý, densaýlyqty qorǵaý men nyǵaıtý boıynsha telebaǵdarlamalar men beınerolıkterdi, dáristik fılmderdi sýrdoaýdarymmen daıyndaý.
Dóńgelek ústelde Qazaqstanda múgedektik statýsy bar 448,6 myń adam ómir súretindigi, olar turǵyndardyń jalpy sanynyń shamamen 3 paıyzyn quraıtyndyǵy aıtyldy. Qatysýshylardyń aıtýynsha, olardyń kóbisi eńbekke qabiletti jastaǵy kisiler, al olardyń 17,5 paıyzy - balalar. 16 jastan asqan 20 myńdaı adam janarynan aıyrylǵandar, 19 myń adam - kereńdikke ushyraǵandar.
Jıynǵa qatysýshylar jumys sońynda 2020 jylǵa deıin múgedekter jaǵdaıyn jaqsartý boıynsha Ulttyq áreket etýde engiziletin josparǵa óz pikirlerin bildirip, Densaýlyq saqtaý mınıstrligine baǵyttalǵan "Múmkindigi shekteýli jandardyń reprodýktıvtik quqyǵy" rezalıýtsııasyn qabyldady.
