Almatyda múmkindigi shekteýli jandardyń jetistikterin marapattaıtyn shara ótedi
ALMATY. 23 qarasha. QazAqparat /Názıra Eleýhan/- 3 jeltoqsan - Halyqaralyq múgedekter kúni Abaı atyndaǵy opera jáne balet teatrynda múmkindigi shekteýli jandardyń mádenıet,
sport, bilim jáne qoǵamdyq qyzmette jetken jetistikterin marapattaıtyn «Samǵaý» alǵashqy qoǵamdyq syılyǵyn marapattaý rásimi ótedi. Bul týraly búgin Almaty ótken arnaıy baspasóz máslıhatynda «Baýyrjan» qoǵamdyq qaıyrymdylyq qorynyń prezıdenti, atalmysh sharanyń uıymdastyrýshysy Juldyz Omarbekova málim etti.
Onyń aıtýynsha, bul - TMD elindegi múmkindigi shekteýli jandardyń jetistikterin marapattaıtyn jalǵyz syılyq.
"Búginde baıqaýǵa 50-den astam usynys kelip tústi. Qabyldaý telefonyna kúnine 100-den asa telefon shalynǵan. Usynystardy qabyldaý 1 qarashada bastalǵan bolatyn. 25 qarashaǵa deıin ótinishter áli de qabyldanady. Baıqaýǵa qatysýshylardy 6 atalym boıynsha, shyǵarmashylyq deńgeıine qaraı iriktep alatyn bolamyz. Elimizdegi mádenıet, bilim, sport, saıasat, ádebıet, ǵylym jáne shoý-bıznestiń tanymal jáne qurmetti 11 azamattarynan turatyn qazylar alqasy syılyqtyń ıegerlerin tańdaıtyn bolady. Syılyqtyń jalpy júlde qory - 1,5 mln. Bul bizdiń «Baýyrjan» qorynyń qaıyrymdylyq salasyndaǵy ekinshi jobasy. Joba 3 jyl buryn dúnıege kelgen bolatyn. Qarjy tabylmaǵandyqtan iske aspaǵan edi. Bul syılyq múmkindigi shekteýli jandarǵa maqsattaryn oryndaýǵa múmkindik beredi dep oılaımyn",- dedi Juldyz Omarbekova.
Atalmysh sharanyń uıymdastyrýshylary «Baýyrjan» qoǵamdyq qaıyrymdylyq qory men «Meıirim» ońaltý ortalyǵy. Sharaǵa «QazRosGaz» kompanııasy, QR Eńbek jáne áleýmettik qorǵaý mınıstrligi, QR Prezıdenti Ákimshiligi, QR Baılanys jáne aqparat mınıstrligi, «Shevron» kompanııasy, «Kazenerdjı» qaýymdastyǵy, «Qazaqstan temir joly» UK» AQ, "Eır Astana" áýe kompanııasy, «SaýstOıl» kompanııasy qoldaý bildirgen.
