Almatyda múmkindigi shekteýli jandardy jumyspen qamtý úshin arnaıy kvota bólinedi
ALMATY. QazAqparat - Almaty ákimdigi múmkindigi shekteýli jandardy jumyspen qamtýǵa arnaıy kvota bóledi. Bul týraly Erbolat Dosaev Naýryzbaı aýdany turǵyndarymen kezdesý barysynda aıtty, dep habarlaıdy QazAqparat tilshisi.
Qala basshysymen kezdesýge kelgen Naýryzbaı aýdanynyń turǵyny, birinshi top múgedegi, zaǵıp jan qolynda dıplomy bolsa da, jumysqa ornalasa almaı júrgenin aıtty.
«Jylyna 15-16 stýdent medıtsınalyq kolledjdi bitiredi. Ózderińiz arnaıy grant bólip, oqytyp jatyrsyzdar. Dıplomymyzdy, arnaıy sertıfıkatymyzdy aldyq. Qolymyzda dıplom bolsa da, eshkim bizdi jumysqa almaıdy», – dep shaǵymdandy ol.
Erbolat Dosaev múmkindigi shekteýli jandardy mamandyǵy boıynsha jumysqa ornalasýyna múmkindik beretin arnaıy kvota bóletinin jetkizdi.
«Osydan biraz ýaqyt buryn jeke kolledjder biz bólgen grantpen balalardy oqýǵa da almaǵan bolatyn. Maǵan osy máselege qatysty hattar kelgen. Men Densaýlyq saqtaý basqarmasyna tapsyrma bereıin jáne arnaıy kvota bóleıin. Ár emhananyń ishinde óziniń kvotasy bolady. Bıyl jáne buryn bitirgen mamandardyń qujattary bir apta ishinde jınastyrylyp, olardyń baǵalary, sertıfıkattary durys bolsa, bir aı ishinde densaýlyq saqtaý mekemelerindegi bos oryndarǵa ornalastyrý qarastyrylsyn. Jyl saıyn bitirgen mamandar sanyna qaraı kvota bólinetin bolady», – dedi qala ákimi.
