Almatyda múmkindigi shekteýli balalarǵa qashyqtyqtan bilim berý jobasynyń tusaýy kesildi
ALMATY. 21 aqpan. QazAqparat - Qazaqstanda tuńǵysh ret qashyqtyqtan bilim berý tehnologııalary negizinde múgedek balalardy UBT-ǵa daıyndaý jobasy qolǵa alynyp, Almatyda alǵashqy ilki jobanyń tusaýy kesildi.
Mundaı ıgi baǵdarlamany oryndaýshylar - QR Eńbek jáne halyqty áleýmettik qorǵaý mınıstrligi, Almaty qalasynyń jumyspen qamtý jáne áleýmettik baǵdarlamalar basqarmasy, «Turan» ýnıversıteti men «JTI» JShS kompanııasy jáne Qazaqstandaǵy BUUDB.
Jobanyń negizgi maqsaty - qashyqtyqtan bilim berý tehnologııalaryn qoldaný negizinde erekshe qajettiligi bar múgedek adamdardy sapaly bilimmen qamtamasyz etý bolyp tabylady.
«Múgedekterge arnalǵan jańa tujyrymdama qolǵa alynyp jatyr. Sonyń biri árıne, balalardy oqytý. Olarǵa mamandyq berý máselesi bolyp tabylady. Sondyqtan, qandaı da bir isti bastaǵanan keıin, onyń qandaı kemshilikteri bar, qaı jerge kóńil bólý kerek, qandaı ádisteme jaǵyn damytý kerek, sony bilip alýymyz qajet,-deıdi QR Eńbek jáne halyqty áleýmettik qorǵaý mınıstri Gúlshara Ábdihalyqova.
Onyń aıtýynsha, ilki jobaǵa múmkindigi shekteýli 20 bala qatysady. Olar 6 aı ishinde ulttyq biryńǵaı testke daıyndalyp, qalaǵan mamandyǵy boıynsha JOO-ǵa túsýge múmkindik alatyn bolady. Al, qarjylandyrýshy kompanııalar iriktelgen 20 balanyń úıine qajetti kompıýter men baılanys quraldaryn ornatyp, olardyń tolyqqandy bilim alýyna jaǵdaı jasaıdy. Aldaǵy ýaqytta elimizde tirkelgen 50 myńnan astam 18 jasqa deıingi múmkindigi shekteýli balalardyń barlyǵyna bilim berý úshin qashyqtyqtan oqytý jobasyn jetildirý qolǵa alynatyn bolady.
Al jobanyń quny 3 mıllıon teńgeni quraıdy.
