Almatyda múmkindigi shekteýli balalarǵa arnalǵan merekelik shara ótti
ALMATY. Maýsymnyń 2-si. QazAqparat /Názıra Eleýhan/ -Búgin Almatyda M.Áýezov atyndaǵy akademııalyq drama teatrda Balalardy qorǵaýdyń halyqaralyq kúnine oraı, «Shuǵyla» qoǵamdyq qory men Almaty qalasynyń jumyspen qamtý jáne áleýmettik baǵdarlamalar basqarmasynyń birlese uıymdastyrýymen Almaty qalasynda turatyn múmkindigi shekteýli balalarǵa arnalǵan quttyqtaý merekelik is-sharasy ótti,
dep habarlaıdy QazAqparat.
Atalmysh sharaǵa Bostandyq, Túrksib, Alataý, Medeý, Almaly, Áýezov jáne Jetisý aýdandarynyń jumyspen qamtý jáne áleýmettik baǵdarlamalar bólimderinde tirkeýde turǵan 250-deı bala men olardyń ata-analary qatysty. Olarǵa arnalyp elimizdiń estrada juldyzdary men bı toptarynyń qatysýymen qaıyrymdylyq kontserti ótti. Barlyq balalarǵa syılyqtar tabystaldy.
«Bul bizdiń birinshi sharamyz emes. 2007 jyly qurylǵan bizdiń qordyń negizgi maqsaty - qaıyrymdylyq sharalar atqarý, qoǵamnyń áleýmettik jaǵdaıyn jaqsartýǵa atsalysý, ulttyq ári rýhanı qundylyqtardy dáripteý bolǵandyqtan elimizdiń keleshegi, bolashaǵymyz sanalatyn balalardyń merekesi de bizdiń nazarymyzdan tys qalmaıdy. Biz osy sharamen shektelip qana qoımaı, erteń ol balalarǵa oqýǵa túsýine, maman ıesi bolýyna kómektesip, járdem berip otyramyz. Daryndy balalardy shet elde oqýǵa ornalasýǵa kómek beremiz. Biz jaqynda múmkindigi shekteýli zerek te, alǵyr balalar úshin 75 oryndy pansıonat ashtyq, onda balalar tegin oqıdy. Bul sharalardy atqarýdaǵy maqsatymyz - balalarǵa baqyt berý, qýanysh syılaý, tolyqqandy azamat bolýyna kómektesý, bilim alýyna, erteń eline qyzmet etetin jaqsy azamat bolýyna yqpal etý», dedi «Shuǵyla» qoǵamdyq qorynyń prezıdenti Máýlen Qaldybek.
