Almatyda múmkindigi shekteýli balalar shyǵarmashylyǵynyń kórme-satylymy uıymdastyryldy
ALMATY. 1 maýsym. QazAqparat /Erbol Azanbek/ - Búgin Almatyda «Eldanı» qaıyrymdylyq qory «Nur Otan» HDP-nyń qoldaýymen múmkindigi shekteýli balalar shyǵarmashylyǵynyń kórme-satylymy - «Júregimniń jylýyn saǵan syılaımyn!» aktsııasyn ótkizdi.
Halyqaralyq balalardy qorǵaý kúnine oraı ótkizilgen sharanyń maqsaty - erekshe qajettilikteri bar balalar men jastardyń muń-muqtajyna qoǵamnyń nazaryn aýdarý jáne olardy qoǵamǵa jaqyndatý.
Kórme-satylymǵa múgedek balalardyń qolynan shyqqan keramıkadan, monshaqtan, dekýpajdan, kvılıngten jasalǵan buıymdar, aǵashqa, mataǵa salynǵan oıý-órnekter qoıylǵan.
«Bizdiń qor janynan múgedek balalar shyǵarmashylyǵyn damytý úshin Sheberlik stýdııasy ashylǵan bolatyn. Búgingi kórmege qoıylǵan ónimder sol mektepte oqyǵan jas shyǵarmashyl balalardyń qolynan shyqty. Olardyń baǵasyn balalar qajettilikterine qaraı ózderi belgiledi. Satylymnan túsken qarjy olardyń shyǵarmashylyǵyn odan ári shyńdaýǵa jumsalady», - deıdi «Eldanı» qaıyrymdylyq qorynyń ókili Gúlzıra Amantýrlına.
