Almatyda múmkindigi shekteýli balalar tsırktegi ǵajaıypty tamashalady

Sharany tamashalaýǵa múmkindigi shekteýli, jetim, áleýmettik turmysy tómen otbasynan shyqqan balalar keldi.
 

Búldirshinder belgili ertegiler men anımatsııalyq fılmderdiń keıipkerleri alyp transformerlar, sıqyrly ponı Pınkı Paı men Radýga, batyl Moana, Aıaz ata men Aqshaqardy kórdi. 
    

«Bizdiń aýdıtorııamyz kóbinese balalar. Olarǵa ne unaıdy? Olarǵa ertegi keıipkerleri, anımatsııalyq fılm keıipkerleri unaıdy. Sizder búgin sapaly kostıým, sapaly jumys kórdińizder. Tsırk janry - sáıkespeıtin janrlardy biriktirý bolyp tabylady. Bul - biregeı, oqıǵa jelisin boljap bolmaıtyn, tsırk ónerindegi barlyq janrlaryn biriktiretin qoıylym-ertegi», - dedi qoıýshy-rejısser Marına Redko.

Aıta ketý kerek, búgin sahnaǵa eń jas ártis - 6 jastaǵy Álııa shyqty. Búldirshin 5 jasynan bastap gımnastıkaǵa qatysyp keledi. Onyń ata-anasy Tutqabaeva Indıra men Ońalbaev Talǵat osy tsırk ártisteri. Álııadan úlken tuńǵysh uldary Danııar da búgin manejde óner kórsetti.   
 

«Biz otbasymyzben tsırkte jumys jasaımyz. Eki balamyzdy da aqyryndap baýlyp jatyrmyz. Qyzym týǵaly beri denesiniń ıilgishtigi, býyndarynyń jumsaqtyǵy  kórindi. Kishkentaı kezinde shpagatta uıyqtap jata beretin. Sosyn gımnastıkaǵa berdik. Negizi debıýt byltyr bolýy tıis edi. Byltyr ózi ábden qoıylymnyń aldyna kelgende shyqpaımyn dedi», - dedi anasy Indıra Tutqabaeva.

Sonymen qatar Shabyt festıvaliniń laýreattary, birneshe halyqaralyq baıqaýlardyń jeńimpazdary Anna men Olga Demıdova, Marına Starodýbova óner kórsetti.
    

Jańa jyldyq shoýǵa álemdik tsırk ártisteri, úıretilgen aıý, ıt, túıe, jylqy jáne ponılar qatysady.
   

Sıqyrly jańa jyldyq shoýdy kásibı stsenarıster men qoıýshy-rejıserlar, kompozıtorlar men sýretshi- modelerler, hoeograftar men baletmeısterler, dybys jáne jaryq rejısserleri daıyndaǵan.
  
 

Ártisterdiń óneri fantastıkalyq lazerlik arnaıy áserlermen, kásibı sahnalyq jaryq pen dybys, LED ekrandaǵy beıneleýmen kórkemdeldi.