Almatyda múmkindigi shekteýli adamdarǵa arnalǵan týrıstik avtobýs baǵytyn ashý jobasy iske asýda
"Shara shilde aıynyń 1-i kúni bastaldy. Joba barysynda múmkindigi shekteýli jolaýshylar 15 adam syıatyn, arnaıy jabdyqtalǵan avtobýstarmen ár demalys saıyn, senbi, jeksenbi kúnderi qalanyń eń kórikti jerlerimen tanysýǵa múmkinshilik alýda. Ókinishke oraı, qarajattyń azdyǵynan ekskýrsııalar tamyzdyń 7-sine deıin jalǵasatyn bolady. Biz qazir ákimshiliktiń kómegine úmit artyp otyrmyz. Degenmen, bolashaqta avtobýstardyń júıeli túrde júrýine barymyzdy salatyn bolamyz", dedi jobanyń eriktiler múshesi Nursultan Belqojaev. Onyń aıtýynsha, júrgizýshige, úılestirýshige jáne tanystyrýshy-gıdke 225 myń teńge qajet eken. "Eriktiler onyń 15 myńyn ǵana ala alady", dedi ol.
"Búgingi kúni Almatyda 44 myń múmkindigi shekteýli adam turady. Onyń 2 000-y - balalar. Olar úshin óte qajetti ınfraqurylymnyń tapshylyǵynan mektepterde, JOO-da bilim ala almaı, qoǵamdyq kólikti paıdalana almaı otyr. Ondaı adamdar jyldar boıy úılerinde-tórt qabyrǵada qamalyp otyrady. Sondyqtan biz bul jobanyń júıeli túrde jumys isteýin qalaımyz", dedi jobanyń úılestirýshisi Alma Raıysova.
«Arjan» qoǵamdyq qorynyń jetekshisi Qasıet Omarovtyń aıtýynsha, joba - múmkindigi shekteýli adamdarǵa týrıstik saıahat jasaýǵa múmkindik berýimen erekshe. "Biz osy jobaǵa arnaıy zaǵıp jandar úshin kitap daıyndadyq. Onda qalamyzdyń eń ádemi de, kórikti jerleri beınelengen", dedi ol.
Jobanyń uıymdastyrýshylary memlekettiń jáne metsenattardyń kómegine úmit artýda. Olardyń aıtýynsha, jobaǵa qatysýǵa barlyq ynta bildirýshiler shaqyrylady.
Bul joba «Arjan» qoǵamdyq qorynyń uıymdastyrýymen jáne "Sábı" qorynyń qoldaýymen, Qazaqstan týrıstik qaýymdastyǵynyń, Qazaqstannyń múgedekter odaǵynyń, Zaǵıptar kitaphanasynyń, Erjan Tátishov qorynyń, «MediaNet» halyqaralyq jýrnalıstıka ortalyǵy men «Interfaks-Qazaqstan» agenttiginiń áriptestigimen júzege asýda.
