Almatyda múliktiń barlyq túri boıynsha zalal 112 mlrd teńgeni qurady

ALMATY. QazAqparat - Almatyda jappaı tártipsizdikter kezinde bıznes nysandary arasynda qyzmeti azyq-túlik satýmen baılanysty emes dúkender eń kóp zardap shekken. Bul týraly Almaty qalasy ákiminiń orynbasary Іlııas Óserov málim etti, dep habarlaıdy QazAqparat tilshisi.

Búgingi kúni Almatyda qala ákiminiń tapsyrmasy boıynsha zalaldy baǵalaý jónindegi qalalyq jáne aýdandyq komıssııalar qurylyp, jumys isteýde. Komıssııa jumysyna barlyq qyzmetter men uıymdar, onyń ishinde «Atameken», táýelsiz baǵalaýshylar men aýdıtorlar palatasynyń ókilderi kirgen.

14 qańtardaǵy málimetke sáıkes, Almatyda múliktiń barlyq túri boıynsha zalaldyń jalpy somasy 112 mlrd teńgeden astamdy qurady. Onyń ishinde bıznes sýbektileri boıynsha – 67 mlrd teńge.

Іlııas Óserovtyń aıtýynsha, qalada azyq-túlik emes dúkenderine – 20,9 mlrd, azyq-túlik dúkenderine – 5,7 mlrd, qarý-jaraq dúkenderine – 6,4 mlrd, lombardtarǵa – 2,9 mlrd, qoǵamdyq tamaqtaný obektilerine 1,8 mlrd teńgege zaqym kelgen.

«Qarjy uıymdary boıynsha (bank bólimsheleri, bankomattar) aldyn ala derekke sáıkes, zalal 701,7 mln teńgeni qurady. Qarjy naryǵyn retteý jáne damytý agenttigi ekinshi deńgeıli banktermen birlesip, zaqym kelgen nysandar boıynsha derekter jınaýda. Jaqyn kúnderi agenttikten málimetter alamyz dep kútýdemiz», - dedi ol.

Іri bıznes boıynsha shyǵyn shamamen 25 mlrd teńgeni qurady. Budan basqa, janar-jaǵarmaı quıý beketterine 306 mln teńge kóleminde zaqym kelgen. Basqa nysandar boıynsha 3,1 mlrd teńgeni qurady.

«20 ákimshilik ǵımarat, polıtsııa departamentiniń 10 beketi, 17 ekopost jáne áýejaı ǵımaraty boıynsha shyǵyn 22,6 mlrd teńgeden asady», - dep atap ótti Іlııas Óserov. Sonymen qatar ákimdik ǵımaratyna – 20 mlrd, QR Bas prokýratýranyń arnaıy esepke alý basqarmasynyń ǵımaratyna – 2 mlrd, Polıtsııa departamenti men aýdandyq basqarmalardyń ǵımarattary men beketterine - 205 mln,17 ekopostqa – 162,7 mln, medıtsınalyq nysandarǵa 2,1 mln teńgege zaqym kelgen.