Almatyda muqtaj 53 otbasyǵa páter berildi

ALMATY. QazAqparat - Almatyda búgin 53 otbasy qonys toıyn toılamaq. Kezekti turǵan múmkindigi shekteýli azamattar, kópbalaly otbasylar, áskerı qyzmetshilerge «Nurly jer» baǵdarlamasy aıasynda páter kilti tabys etildi, dep habarlaıdy QazAqparat tilshisi.

Turǵyndar «Dýman-2» yqshamaýdanynyń (Merkýr-Grad) turǵyn úı kesheninen baspanaǵa qol jetkizdi.

Saltanatty sharaǵa turǵyndar, QIK ókilderi, BAQ ókilderi qatysty.

«Qazaqstan Ipotekalyq Kompanııasy» IU» AQ «Satyp alý quqyǵymen jalǵa beriletin turǵyn úı» baǵyty boıynsha barlyǵy 26 bir bólmeli páter (52,3-61,5 sharshy metr), 27 eki bólmeli páter (76,8-83,9 sharshy metr) paıdalanýǵa berdi. Turǵyndar  páterdiń ár sharshy metri úshin aıyna 1119,23 teńge tóleıtin bolady. 20 jyldan soń  baspana turǵyndardyń  menshigine beriledi. Nesıeni merziminen buryn óteýge ruqsat etilgen.

 «Memleket basshysynyń bastamasymen júrgizilip jatqan «Nurly jer» baǵdarlamasymen 2015-2017 jyldar arasynda  elimizde QIK 17 000 astam páterdi paıdalanýǵa berdi. Almatyda 5000 jýyq otbasy baspanaly boldy. Jaqynda «Jas qanat» shaǵynaýdanynda, Besaǵash aýylynda páterler beriledi. QIK baǵdarlamasy arnaıy áleýmettik jaǵynan az qorǵalǵan otbasylardy baspanamen qamtýǵa baǵyttalǵan», - dedi «QIK» IU» AQ Basqarmasy tóraǵasynyń orynbasary Rýslan Kákim.

«Satyp alý quqyǵymen jalǵa beriletin turǵyn úı» kóp balaly jáne tolyq emes otbasylarǵa, múgedek balalary bar otbasylarǵa, múgedek balalary bar nemese olardy tárbıeleýshi otbasylarǵa, jetim balalarǵa, ata-anasynyń qamqorlyǵynsyz qalǵan balalarǵa, oralmandarǵa, 1 jáne 2 toptaǵy múgedekterge, sondaı-aq memlekettik qyzmetshilerge, áskerı qyzmetkerlerge, arnaıy memlekettik organdar qyzmetkerlerine, bıýdjettik uıymdar qyzmetkerlerine arnalǵan.