Almatyda Muqaǵalı Maqataevtyń 80 jyldyq mereıtoıyna arnalǵan baıqaý bolyp ótti
ALMATY. 24 jeltoqsan. QazAqparat /Názıra Eleýhan/ - Keler jyly aqıyq aqynymyz Muqaǵalı Maqataevtyń týǵanyna 80 jyl tolady. Osy oraıda Almatydaǵy aqyn esimimen atalatyn №140 mektep-gımnazııada mekteptiń 1-11 synyptardyń ata-analary arasynda Muqaǵalı muralary boıynsha ózara baıqaý bolyp ótti.
Atalmysh mekteptiń dırektory Sánııa Tileýbaıdyń aıtýynsha, mektepte mereıtoıǵa daıyndyqtar bastalyp, aqyn muralaryn nasıhattaý maqsatynda túrli sharalar ótýde jáne oǵan oqýshylarmen qatar, ata-analar da jumyldyrylǵan.
Baıqaýǵa qatysýshylar Muqaǵalı sózderine jazylǵan ánderdi oryndap, óleńderin mánerlep oqý atalymdary boıynsha synǵa tústi. Sondaı-aq, olar aqynnyń ómirine baılanysty vıktorınalyq saýaldarǵa jaýap berdi.
«Bizdiń bilim ordamyz aqyn esimine laıyqty ma, biz Muqaǵalı muralaryn qanshalyqty bilemiz, osy tóńirekte toıǵa daıyndyq retinde osy baıqaýdy uıymdastyrǵan bolatynbyz. Baıqaýǵa qatysýshylardyń óneri bizdi tańǵaldyrdy. Aldaǵy ýaqytta ol óz jalǵasyn tappaq», - deıdi mektep dırektory Sánııa Tileýbaı. Onyń aıtýynsha, qatysýshylar arasynda ónerli jandar óte kóp bolǵandyqtan júldegerlerdi anyqtaý ádilqazylarǵa ońaı bolmaǵan.
Baıqaý qorytyndysy boıynsha ádilqazylar alqasynyń sheshimimen án aıtý saıysynan eń kóp upaı jınaǵan belgili telejúrgizýshi, kompozıtor Arman Dúısenov, Baqyt Eldıbekuly, óleńderin oqýdan Qazaq radıosynyń tilshisi Muhtar Tortaıuly, tanymal ánshi Merýert Túsipbaeva jáne Ǵaını Abnasyrova syndy ata-analar baıqaýdyń jeńimpazdary atanǵan.
Sondaı-aq synyptar arasyndaǵy júldeger toptar da gramotalarmen jáne baǵaly syılyqtarmen marapattaldy.
«Aqyn murasyn nasıhattaýǵa zor úles qosyp kele jatqan bilim ordasynyń ıgi bastamasy elimizdiń ózge mektepterinde jalǵasyn tapsa nur ústine nur bolar edi», - deıdi Qazaq radıosynyń tilshisi Muhtar Tortaıuly.
