Almatyda múgedekterdiń quqyǵy men múmkindikteri talqylanady
ALMATY. 16 jeltoqsan. QazAqparat - Almatyda 20 jeltoqsan kúni Qazaqstan halyqtyq kommýnıster partııasynyń muryndyq bolýymen «Múgedekterdiń quqyǵy men múmkindikteri» degen taqyrypta dóńgelek ústel jıyny ótedi.
Oǵan ártúrli saıası partııalar, qoǵamdyq uıymdar men múgedekter qaýymdastyqtarynyń ókilderi qatysady. Onyń qorytyndysy boıynsha: QR Parlament Májilisindegi «Halyqtyq kommýnıster» fraktsııasyna «Múgedekterdi áleýmettik qorǵaý» zańyna baılanysty tolyqtyrýlar men usynystar jiberiledi. Múgedekterge baılanysty qoǵamda oryn alyp otyrǵan problemalar men zańdardyń oryndalýy jónindegi depýtattyq saýal joldanady. Yntymaqtastyq jónindegi pakt daıyndalyp, onyń negizinde «Múgedekterdiń quqyǵyn qorǵaý qoǵamdyq keńesin» qurý josparlanyp otyr. Qoǵamdyq keńestiń jospary ázirlenip, maqsat múddeleri anyqtalady.
Buǵan QHKP-nyń Almaty qalalyq komıteti janyndaǵy tegin zańgerlik kómek kórsetiletin «Qoǵamdyq qabyldaý» bólimine sońǵy birneshe aıdyń ishinde múgedek jandardan kóp aryz-shaǵym túsýi túrtki bolyp otyr. Mamandardyń aıtýynsha, álemniń árbir onynshy turǵyny múmkindigi shekteýly adamdar. Qazaqstanda olardyń sany jarty mıllıonǵa jýyqtap otyr. Bul sandardyń tasasynda tálkekke túsken taǵdyrlar tur. Múgedek jandar úshin bilim alyp, mansap qýý emes, qala kóshelerinde serýendeýdiń ózi arman. Olar járdemaqymen kún kóredi. Múmkindigi shekteýli azamattardyń 75 paıyzy eńbekke qabiletti bolsa da, jumys berýshiler qabyldaýǵa qulyqty emes. Memleket osy isterdi sheshýge 3 jylǵa 30 mıllıard teńge bólip otyr.
