Almatyda múgedek stýdent jataqhanada soqqyǵa jyǵyldy

ALMATY. QazAqparat – Almatyda Turan ýnıversıtetiniń múmkindigi shekteýli stýdenti Samat Ramazanovty jataqhanadaǵy kórshisi soqqyǵa jyqqan. Bul derekti qalalyq Polıtsııa departamenti rastady, dep habarlaıdy QazAqparat tilshisi.

Bul týraly Facebook-te qaıyrymdylyq sharalaryn uıymdastyrýmen aınalysatyn «Help Today» qorynyń jetekshisi Elmıra Álıeva jarııalady.

«Bizdiń qorymyzdyń qyzmetkeri, stýdent Samat Ramazanovty Turan ýnıversıteti jataqhanasyndaǵy kórshisi soqqyǵa jyqqan. Samat kórshisinen terezeni ashpaýyn, temeki shekpeýin ótingen. Sodan ekeýiniń arasyndaǵy sóz talastyń arty tóbeleske aparǵan. Samatty Óserov uryp jyqqan. Bul oqıǵadan soń jataqhanaǵa eki ret jedel járdem shaqyrylǵan», - dedi Elmıra Alıeva.

Samat Ramazanov Ulttyq pedıatrııa jáne balalar hırýrgııasy ortalyǵynyń balalar onkologııasy bóliminde saıqymazaq bolyp jumys jasaıdy.

Týabitti tuqymqýalaıtyn mýkopolısaharıdoz dertimen aýyrady.

Qazir Samat Ramazanov Bostandyq aýdany polıtsııa basqarmasyna aryzdanyp qoıdy.

«Ramazanovtyń aryzyn Bostandyq aýdandyq polıtsııa basqarmasy qabyldap aldy. Qazir tergeý amaldary júrip jatyr. Tergeý aıasynda sot medıtsınalyq saraptama taǵaıyndalady. Saraptama qorytyndysyna sáıkes protsessýaldy sheshim qabyldanatyn bolady», - dedi qalalyq Polıtsııa departamentinen.

Al dárigerler Samattyń jaǵdaıyn ortasha dep baǵalap otyr.

«Patsıenttiń basy jaraqattanǵan. Betinen soqqy alǵan. Qajetti medıtsınalyq kómekti qabyldap jatyr. Neırohırýrgııalyq bólimge jatqyzyldy», - dedi qalalyq Qoǵamdyq densaýlyqty saqtaý basqarmasynan.