Almatyda mototsıklshi qaǵyp ketken balanyń haly qalaı
ALMATY. QazAqparat - Almaty qalasynyń dárigerleri Respýblıka alańynda mototsıklshi qaǵyp ketken balanyń jaǵdaıy týraly aıtty, dep habarlaıdy QazAqparat.
«Bala jedel medıtsınalyq kómek ortalyǵyna jetkizildi. Ol bas súıek jáne mıdyń ashyq jaraqatyn, sondaı-aq ish qýysy músheleriniń, keýde músheleriniń jaraqatyn alǵan, oń ıyǵy synǵan. Baýyry jarylǵan. Sol sebepti operatsııa jasalǵan. Qazir naýqas reanımatsııada jatyr. Jaǵdaıy óte aýyr», - dep habarlady Almaty qalasynyń qoǵamdyq densaýlyq basqarmasynan.
Eske sala keteıik, 19 shilde kúni saǵat 22:00 shamasynda mototsıklshi Sátpaev kóshesiniń boıymen batys baǵytta, Respýblıka alańy, №4 ǵımaratqa qarama-qarsy baǵytta eki jaıaý júrginshini qaǵyp ketken bolatyn. Bireýi — 1976 jyly týǵan áıel, ekinshisi — onyń 2015 jylǵy balasy. Olar joldy belgilenbegen jerden kesip ótpek bolǵan. Jol-kólik oqıǵasy saldarynan áıel jansaqtaý bólimine jetkizilip, alǵan jaraqattarynan qaıtys boldy, kámeletke tolmaǵan bala qalalyq aýrýhanalardyń birine jansaqtaý bólimine jetkizildi.
