Almatyda mototsıklmen soqtyǵysqan samokat júrgizýshisi mert boldy
ALMATY. QazAqparat- Almatyda samokat men mototsıkl soqtyǵysyp, saldarynan samokat tizgindegen adam qaıtys boldy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, jol apaty búgin túnde saǵat 00:20 shamasynda Bostandyq aýdanynda boldy.
Kim ekeni anyqtalyp jatqan 18-25 jastaǵy jigit elektrosamokatpen Seıfýllın dańǵylynyń boıymen soltústikke qaraı kele jatqan.
Keıin solǵa – Polıtehnıcheskaıa kóshesine buryla bergende Seıfýlın dańǵylynyń boıymen ońtústik baǵytta qozǵalyp kele jatqan mototsıklǵa soǵyldy.
Saldarynan samokat júrgizýshisi qaıtys boldy, 1994 jyly týǵan mototsıklshi qalalyq aýrýhanalardyń birine jatqyzyldy.
«Atalǵan derek Qazaqstan Respýblıkasy Qylmystyq kodeksiniń 345-babynyń 3-bóligi boıynsha sotqa deıingi tergep-tekserýdiń biryńǵaı tizilimine tirkeldi.Tıisti saraptamalar taǵaıyndaldy»,- dep habarlady vedomstvodan.
