Almatyda mototsıkl, moped júrgizýshileri jyl basynan beri 10 myńǵa jýyq jol erejesin buzǵan
ALMATY. QazAqparat – Almatyda mototsıkl, moped júrgizýshileri azamattardyń tynyshtyǵyn buzyp jatyr, dep habarlaıdy QazAqparat tilshisi.
Almaty qalalyq Polıtsııa departamentiniń jergilikti polıtsııa qyzmeti basqarmasy bastyǵynyń orynbasary Serik Shýmaev qalada mototsıkl men moped ıeleriniń tikeleı aǵyndy qondyrǵyny qoldanýy jıi kezdesetini, ol azamattardyń tynyshtyǵyn buzatynyn aıtty.
«Ásirese túngi ýaqytta jáne ruqsat etilmegen jarystardy uıymdastyrady, sondaı-aq manevr jasaý jáne jyldamdyqty shekteý erejelerin óreskel buza otyryp, uıymdastyrylmaǵan toptyq qozǵalystar jasaıdy. Bul qala turǵyndary men basqa da jol qozǵalysyna qatysýshylardyń shaǵymyn týdyrady. Sondaı-aq kún saıyn derlik bizdiń esepterimizde motokólikterdiń qatysýymen bolǵan jol-kólik oqıǵalarynyń qaıtalanatyn derekteri tirkeledi», – dedi ol.
Spıkerdiń aıtýynsha, balamaly kólik túrlerin paıdalanatyn adamdardyń quqyq buzýshylyǵyn anyqtaý jumystary kúsheıtildi. Máselen, aldyn alý sharasynyń bir kúninde moped, mototsıkl júrgizýshileriniń 60-tan astam jol erejesin buzý deregi anyqtaldy. Jyl basynan beri mobıldi kólik júrgizýshileri 10 myńǵa jýyq jol erejesin buzǵan.
Aıyppul kólemi 70 mıllıon teńgeden asty. Sondaı-aq jergilikti polıtsııa qyzmetiniń málimetinshe, Almatyda mopedterdiń qatysýymen 250 jol apaty bolǵan. Saldarynan 10 adam qaza tapty.
«Mopedter men mototsıkl júrgizýshileriniń qatysýymen bolatyn jol-kólik oqıǵalarynyń negizgi sebepteri, negizinen belgilengen jyldamdyqty saqtamaý, qarsy jolaqqa shyǵý, qıylystardan ótý erejelerin buzý, manevr jasaý jáne taǵy da basqa buzýshylyqtar», - dep habarlady polıtsııadan.
