Almatyda mototsıkl men velosıped soqtyǵysyp, eki júrgizýshi de qaza tapty
ALMATY. QazAqparat - Almatyda túnde Medeýge aparar jolda mototsıkl men velosıped soqtyǵysyp, eki adam qaza tapty, dep habarlaıdy QazAqparat tilshisi.
Jol apatynyń vıdeosy áleýmettik jelide tarap jatyr.
Almaty qalalyq polıtsııa departamentiniń málimetinshe, jol-kólik oqıǵasy túngi saǵat bir shamasynda Medeý aýdanynda boldy.
«Mototsıkl men velosıpedtiń soqtyǵysýy saldarynan eki kóliktiń de júrgizýshisi qaza tapty. Atalǵan fakti boıynsha Almaty qalalyq polıtsııa departamentiniń anyqtaý basqarmasy QR Qylmystyq kodeksiniń 345-babynyń 4-bóligi (Abaısyzda eki nemese odan da kóp adamnyń ólimine ákep soqqan jol qozǵalysy erejelerin buzý) boıynsha sotqa deıingi tergeý amaldaryn bastady. Saraptamalar taǵaıyndaldy», - dep túsindirdi qalalyq polıtsııa departamentiniń baspasóz qyzmeti.
