Almatyda mototsıkl qaǵyp ketken áıel mert boldy
ALMATY. QazAqparat – Almatyda mototsıkl mingen adam áıeldi balasymen birge qaǵyp ketti, dep habarlaıdy QazAqparat tilshisi.
Jol apatynyń vıdeosy jelide paıda boldy.
«Sátbaev kóshesiniń boıyndaǵy jańa alańda áıeldi balasymen birge mototsıkl qaǵyp ketti», - dep jazylǵan jazba astynda.
Almaty qalalyq Polıtsııa departamenti 19 shilde kúni saǵat 22:00-de Bostandyq aýdanynda bolǵan oqys oqıǵaǵa qatysty túsinik berdi.
«59 jastaǵy DUKE BLACK mototsıkl júrgizýshisi Sátpaev kóshesimen №4 ǵımaratqa qarama-qarsy batys baǵytta kele jatyp Respýblıka alańynda 2 jolaýshyny qaqqan. Olar 45 jastaǵy áıel men onyń 6 jasar balasy eken. Jol apaty saldarynan jaraqat alǵan ana men bala qalalyq aýrýhananyń reanımatsııa bólimine jatqyzyldy, aýyr jaraqattan áıel sol jerde kóz jumdy. Sondaı-aq, mototsıkl júrgizýshisi de jaraqat alyp, aýrýhanaǵa jetkizildi. Oqys oqıǵa QR QK 345-baby 3-tarmaǵyna sáıkes sotqa deıingi biryńǵaı tergeý reestrinde tirkeldi. Tergeý jumystary bastaldy», - dedi Almaty qalalyq Polıtsııa departamenti anyqtaý basqarmasynyń basshysy Oljas Sháripov.
